Швајцарската полиција ги идентификуваше првите четири жртви од катастрофалниот пожар што избувна во бар во ски-центарот Кран-Монтана за време на новогодишната ноќ, пренесува Би-Би-Си.
Станува збор за две швајцарски државјанки на возраст од 21 и 16 години и двајца швајцарски државјани на возраст од 18 и 16 години, чии тела се предадени на нивните семејства, соопшти кантоналната полиција на Вале.
Од полицијата наведуваат дека идентификацијата била овозможена по „обемна и сложена работа“ на истражните служби и Институтот за судска медицина, а процесот на идентификација на останатите жртви сè уште продолжува.
Во пожарот во барот „Le Constellation“ загинаа 40 лица, а 119 лица беа повредени, соопштија надлежните. Дел од повредените веќе се идентификувани, додека семејствата на лицата кои сè уште се водат како исчезнати се соочуваат со неизвесност и чекање информации.
Прелиминарната истрага покажала дека најверојатна причина за пожарот биле искрите од прскалки поставени на шишиња шампањ, кои биле држени премногу блиску до таванот, по што огнот брзо се проширил.
Швајцарскиот претседател Ги Пармелен трагедијата ја оцени како „една од најтешките што земјата ги доживеала“.
Засега не се објавени дополнителни детали за идентитетот на жртвите, вклучително и нивните имиња.
Полицијата во петокот соопшти дека 113 од повредените се идентификувани, меѓу кои 71 швајцарски државјанин, 14 француски и 11 италијански државјани.
Меѓу загинатите и исчезнатите има голем број тинејџери. Барот „Le Constellation“ бил популарно место меѓу младата популација во ски-центарот, каде што законската возраст за консумирање алкохол е 16 години.
Еден тинејџер од Италија, голфер по професија, беше првата именувана жртва, иако швајцарските и италијанските власти сè уште официјално не ја потврдиле неговата смрт.
Пред барот, зад полициските бариери, граѓани оставаат цвеќиња, играчки и пораки со сочувство, додека во саботата семејствата беа упатувани во конференциски центар во близина на Кран-Монтана.
На местото биле присутни и претставници на италијанската цивилна заштита, заедно со италијанскиот амбасадор во Швајцарија Џан Лоренцо Корнадо, кој изјави дека процесот на идентификација продолжува и дека се очекува да биде завршен до недела попладне.
Според него, процесот оди бавно поради тешките изгореници што ги претрпеле многу од жртвите.
Редакција Фронтлајн
