Високиот функционер на американската Гранична патрола, Грегори Бовино, заедно со дел од агентите распоредени во Минеаполис, се очекува денеска да го напуштат градот и да се вратат во своите матични сектори, дознаваат извори запознаени со разговорите, пренесува Си-Ен-Ен. Со овој потег, од теренската операција се повлекува еден од клучните луѓе вклучени во засилената имиграциска кампања на администрацијата на претседателот Доналд Трамп.
Повлекувањето следи по одлуката на Трамп во Минеаполис да го испрати Том Хоман, висок претставник задолжен за спроведување на имиграциската политика на Белата куќа, по фаталното пукање во кое во саботата беше убиен американски државјанин.
Од Белата куќа соопштија дека Хоман ќе ја преземе координацијата и управувањето со операциите на Имиграциската и царинска служба во градот. Ова се толкува како промена на командната структура на терен и обид за централизирање на контролата врз федералната интервенција по инцидентот што предизвика силни реакции во јавноста.
Фаталниот настан повторно ги отвори прашањата за методите и обемот на федералните имиграциски акции, особено во урбани средини. Локални власти и граѓански организации побараа поголема транспарентност и отчетност за федералното присуство, додека од Вашингтон најавуваат дека засилените мерки против нелегалната имиграција ќе продолжат.
Засега нема официјална потврда дали повлекувањето на Бовино и дел од агентите претставува трајна промена на стратегијата или станува збор за привремено преструктуирање на операцијата во Минеаполис.
