Опозициската СДСМ обвини дека власта сè уште нема дадено одговори за, како што го нарекуваат, „картелскиот скандал со 5 тони дрога од Македонија“, која била запленета во соседна Србија.
„Помина цела недела откако беше објавен картелскиот скандал со 5 тони дрога од Македонија, запленети во соседна Србија. И после цела недела нема одговор – како 5 тони дрога поминала преку македонската граница?“, прашуваат од СДСМ.
Од партијата бараат јасна одговорност од врвот на власта и поставуваат прашање дали зад случајот стојат лица од институциите.
„Кој ќе одговара? Кој во врвот на власта стои зад криминалниот бизнис со шверц на дрога?“, наведуваат од СДСМ.
Според нив, ваков обем на шверц не е можен без институционална поддршка.
„Без поддршка од власта, структури во МВР, во Царина и во други институции, не може да се шверцуваат 5 тони дрога“, велат од опозициската партија, додавајќи дека поврзаноста на криминални структури од Македонија и Србија е „пред очите на јавноста“.
Во соопштението се посочува дека молкот на власта е индикативен.
„Молкот од власта е најсилна потврда“, сметаат од СДСМ.
Дополнително, од партијата наведуваат дека владините соопштенија за заплени на канабис отвораат нови сомнежи, наместо да ги расчистат постојните.
„Со медиумска кампања за заплени на канабис, власта дополнително се заплетка. Ако се запленети 40 тони нелегално произведена марихуана, тогаш што правела власта изминатите две години?“, прашуваат од СДСМ.
Според нив, одговорност мора да има и кај институциите надлежни за производството на медицински канабис.
„Постои точно пропишана законска процедура за производство и чување на медицински канабис, за што се надлежни повеќе институции. Ако незаконски се произведени 40 тони, владата мора да одговори – кој од врвот на власта ќе понесе одговорност?“, се наведува во соопштението.
Ј. Ѓ.
