Поранешниот премиер Зоран Заев со јавно соопштение реагираше на обвинувањата и, како што ги нарекува, „лагите и клеветите“ што, според него, со години ги шират ВМРО-ДПМНЕ, нејзиното раководство, портпароли и медиуми блиски до партијата.
Заев наведува дека веќе пет години е надвор од политиката, откако поднел оставка од сите политички и државни функции, но и покрај тоа, како што истакнува, континуирано е цел на напади.
„Веќе пет години сум надвор од политиката, откако поднесов оставка од сите политички и државни функции. Пет години, речиси секој ден откако заминав, партијата ВМРО-ДПМНЕ, нејзиното раководство, нивните портпароли и медиуми не престануваат да се занимаваат со мене, ширејќи континуирани лаги, клевети и навреди“, наведува Заев.
Тој јавно бара извинување од пратеникот Петрушевски и од ВМРО-ДПМНЕ, посебно во врска со, како што вели, „намерната злоупотреба“ на неговото име во случајот со конфискацијата на медицински канабис.
„Јавно барам извинување од пратеникот Петрушевски и од партијата ВМРО-ДПМНЕ за сите тие лаги, клевети и навреди, вклучително и намерната злоупотреба на моето име во таа режирана драма околу конфискацијата на десетици тони медицински канабис“, пишува Заев.
Тој категорично ги демантира обвинувањата дека има каква било поврзаност со случаите со канабис, како и тврдењата дека остварувал контакти со институции.
„Безобразна лага е дека сум на кој било начин поврзан со случаите со канабис што беа презентирани пред јавноста. Безобразна и дрска лага е дека сум се јавувал во Царинската управа“, нагласува поранешниот премиер.
Во објавата, Заев ги отфрла и другите наводи што, според него, со месеци и години се повторуваат во јавноста.
„Подеднакво одвратни се и останатите нивни лаги за мене, кои ги повторуваат речиси секојдневно откако се повлеков од политиката, а посебно во овие скоро две години колку што се на власт, како онаа дека градам некакви облакодери од 40 ката во Дубаи, дека вршам притисок за купување на болницата на д-р Жан Митрев, дека се мешам во работата на правосудните и други институции“, наведува Заев.
Тој посочува дека со години трпел навреди и напади, но најавува дека овојпат ќе реагира правно.
„Трпам секојдневни навреди веќе пет години. Сите знаат дека никогаш не сум сакал да тужам, се борев за слобода на говорот, но сега е доста“, пишува Заев.
На крајот, поранешниот премиер најавува тужба доколку, како што вели, не следува извинување во законски предвидениот рок.
„Доколку не се извинат во законски предвидениот рок, ќе поднесам тужба против Петрушевски и ВМРО-ДПМНЕ. Ќе се борам со сите правни средства да ја симнам оваа дамка од моето име“, порачува Заев.
Пратеник од ВМРО-ДПМНЕ, Бране Петрушевски, вчера на прес-конференција истакна дека „над 2/3 од 27 тони запленета дрога е од фирма на кадар на СДСМ, соработник на Зоран Заев“.
