Градоначалникот на Скопје, Орце Ѓорѓиевски, најави изградба на нов, модерен булевар „Македонско-косовска бригада“ во општина Чаир, кој треба да ја подобри сообраќајната поврзаност и инфраструктурата во овој дел од градот.
„Скопјани заслужуваат современа, безбедна и функционална инфраструктура. Тоа всушност е еден од темелите на мојата визија за град кој се развива плански, рамномерно и со јасна стратегија, во кој секоја инвестиција значи подобар квалитет на живот, поголема безбедност и почиста урбана средина“, објави Ѓорѓиевски.
Според најавата, проектот ќе опфати изградба на булевар на делницата од раскрсницата со улицата „Џон Кенеди“ до булеварот „Босна и Херцеговина“, во должина од 1,4 километри.
„Наскоро започнуваме со реализација на основниот проект за изградба на булеварот „Македонско-косовска бригада“ во Чаир, на делницата од раскрсницата со „Џон Кенеди“ до раскрсницата со булеварот „Босна и Херцеговина“, во должина од 1,4 километри. Овој потег претставува значајна сообраќајна артерија што ќе ја подобри поврзаноста и проточноста во овој дел од градот“, наведе тој.
Проектот предвидува четири коловозни ленти, по две во секоја насока, средишно зеленило, велосипедски патеки и нови тротоари со ширина од по два метри.
„Проектот предвидува современо и функционално сообраќајно решение со четири коловозни ленти, по две во секоја насока, средишно зеленило за зголемена безбедност и визуелна уреденост, велосипедски патеки во двете насоки, како и нови тротоари со ширина од по 2 метри за сигурно и комфорно движење на пешаците“, соопшти Ѓорѓиевски.
Во рамки на проектот се предвидени и проширувања кај автобуските стојалишта и дополнително зеленило, со цел подобрување на јавниот превоз и урбаната средина.
„Со изградбата на овој булевар создаваме нов урбан простор, помодерен, позелен и поорганизиран. Ја зголемуваме безбедноста, ја подобруваме мобилноста и градиме инфраструктура што ќе им служи на генерации“, истакна градоначалникот.
Тој најави дека реализацијата на инфраструктурните проекти ќе започне во текот на пролетта.
„Од оваа пролет, со подобрувањето на временските услови, Скопје ќе доживее вистинска трансформација. Рамномерниот развој во сите општини, започнува“, додаде Ѓорѓиевски.
