СДСМ со ново соопштение го критикуваше премиерот Христијан Мицкоски во врска со користењето на владиниот авион и плановите за набавка на нов државен воздухоплов, барајќи одговори за трошоците и оправданоста на таквата одлука.
Од партијата наведуваат дека премиерот треба да објасни под кои околности го користел владиниот авион, како и да ги соопшти деталите за неговите патувања.
„Сега кога Мицкоски призна дека го водел семејството на море на трошок на граѓаните, нека каже и кај кого беше на Јадранско море“, се наведува во соопштението на СДСМ.
Партијата исто така оцени дека средствата треба да се насочат кон подобрување на животниот стандард на граѓаните, наместо кон, како што велат, „луксуз на власта“.
„Многу тажната приказна на премиерот Мицкоски ја доведе до солзи половина Македонија. Авион морало да се купи за да служи во хуманитарни цели. Очигледно за него лично патувањето на море со авион е „хумано“? Бидејќи морето има лековити дејства, сигурно со нов авион и нови часовници од 60 илјади евра ќе му бидат потребни. Често народот вели дека и парите може да бидат лековити. Хумано не е исто што и хуманитарно. Би било хумано да се зголемат платите на работниците на 600 евра. Затоа што луѓето едвај врзвуваат крај со крај, не можат да ги платат сметките и да обезбедат храната за своите семејства. А ако се плаши да лета со владиниот авион, како што вели, постојат и комерцијални летови. Е сега не мора со бизнис класа како што е навикнат и со карти од 4.000 евра, може да патува и со економска класа, затоа што нашата економија не е за бизнис класа“, се наведува во реакцијата од СДСМ.
Овие реакции следуваат откако премиерот Мицкоски изјави дека Владата ќе се повлече од планот за набавка на нов државен авион по јавните критики.
„Ќе се повлечеме од таа набавка и ќе се молиме да останеме живи. Доколку се урнеме некаде и починеме, претпоставувам дека ќе стане јасно дека дебатата за некоја идна влада и идни премиери е беспредметна“, изјави Мицкоски, одговарајќи на новинарско прашање.
Тој посочи дека владин воздухоплов користел четири пати, наведувајќи дека во еден случај бил испратен да го врати во Скопје откако пропуштил комерцијален лет од Хрватска поради службени обврски.
Според премиерот, набавката на нов авион била разгледувана како долгорочно решение кое би служело и за идните влади и за хуманитарни мисии.
Ј. Ѓ.
