ВЛАДАТА не отстапува ниту педа од одлуките и мерките кои се однесуваат на забраната за движење и за време на Велиденските празници, а кои се во интерес за заштитата на јавното здравје и во интерес на здравјето на секој граѓанин. Тие важат за секого, уште еднаш порача на неговиот официјален фејсбук профил вечерва премиерот Оливер Спасовски.
СО досега направените 10.000 тестирања на Ковид-19, земјава е лидер на Балканот. Пред нас е само Словенија, вели директорот на Центарот за јавно здравје, Арбен Зибери.
ПРЕМИЕРОТ Оливер Спасовски, вицепремиерот Бујар Османи, министерите за здравство и за образование и наука Венко Филипче и Арбер Адеми, денеска остварија средба со директорката на Општата болница во Куманово Снежана Захариева и епидемиолозите при што се информираа за тековната состојба и предизивиците со кои се соочуваат, за надминуавње на тековните проблеми.
МИНИСТЕРОТ за економија Крешник Бектеши денеска оствари видео-состанок со амбасадорката на Обединетото Кралство, Рејчел Галовеј на кој тема беа мерките кои што ги превзема Владата за поддршка на компаниите за справување со последиците од здравствено-економската криза предизвикана од корона вирусот, како и плановите за повторно враќање на економијата во нормала.
ЗАТВОРЕНИКОТ од Истражниот затвор што починал денеска бил зависник од дрога и не покажувал знаци на КОВИД-19.
АКТИВИСТИТЕ за бездомни животни, кои се дел од регистирани здруженија, ќе добиваат дозвола два часа дневно во услови на ограничено движење за време на претстојниот продолжен викенд да можат да ги нахранат и да се грижат за бездомните животни, одлучи денеска Кризниот штаб, информираат од Министерството за информатичко општество и администрација.
ВО рамките на мерките кои Град Скопје ги претстави неодамна, а со кои излегува во пресрет на независната културна сцена, денес преку онлајн пренос може да се проследи првиот од серијата „улични концерти“,настапот на LEPI XHONI.
СПЕЦИЈАЛНИОТ пратеник на Светската здравствена организација за вирусот Ковид-19, Дејвид Набаро повика какви било обвинувања против организацијата да се остават на страна додека не се победи вирусот.
Во ПОЛСКА, група граѓани се собраа на улица во тек на полицискиот час за да се спротивстават на предлогот со кој речиси целосно би се забранил абортусот во земјата.
ВЛАДАТА на Белгија попладнево најави дека рестриктивните мерки ќе се продолжат до 3 мај, по што би требало да започне постепено олеснување, доколку ситуацијата тоа го дозволи.
