Нападот на новинарската вечера во Белата куќа стана мета на брзо ширење дезинформации и неосновани теории на заговор, кои се појавија само неколку часа по инцидентот. NBC News пренесува дека на социјалните мрежи масовно се шират тврдења дека пукањето било „инсценирано“ или дека станува збор за т.н. „лажно знаме“ (false flag) операција, и покрај бројните докази и сведоштва од новинарите кои беа присутни во салата.
Истражните органи веќе потврдија дека напаѓачот е 31-годишниот Коул Томас Ален од Калифорнија, кој бил вооружен и дејствувал со политички мотиви. Неговиот брат дури и потврдил дека Ален испратил пораки со анти-Трамп содржина до семејството пред нападот. Сепак, скептицизмот кон институциите и силната партиска поларизација во САД придонесоа овие теории да се шират со рекордна брзина, што го забележа и самиот претседател Трамп во интервју за „60 Minutes“.
Експлозија на манипулации на социјалните мрежи
На платформите како X (поранешен Twitter), Reddit и Instagram, терминот „staged“ (инсценирано) стана еден од најпопуларните веднаш по вестите за пукањето. Корисниците споделуваат вештачки генерирани (AI) видеа, лажни снимки од безбедносни камери и извртени изјави на функционери како „доказ“ за теоријата на заговор. Некои дури тврдат дека администрацијата го организирала нападот за да добие политички поени и поддршка за изградба на нова свечена сала во источното крило на Белата куќа.
Експертите предупредуваат дека ваквото ниво на дезинформирање е опасно за демократскиот систем. „Опасноста е во тоа што ваквиот длабоко вкоренет сомнеж го оневозможува функционирањето на политичкиот систем и довербата во законите“, изјави Марк Фенстер, професор на Универзитетот во Флорида.
