Премиерот Христијан Мицкоски, кој се наоѓа во билатерална посета на Турција, информираше за почетокот на економскиот дел од активностите во Истанбул, каде што предводи владина и бројна бизнис делегација. Премиерот истакна дека Владата ја продолжува воспоставената традиција за организирање на интензивни „B2B“ (бизнис-за-бизнис) настани и директни средби меѓу стопанствениците. Тој потсети дека овој успешен модел на поврзување, кој започна во Унгарија, а продолжи во Австрија и на неодамнешната билатерална средба со хрватската бизнис заедница во Охрид, сега се имплементира и на турскиот пазар, соопштуваат од Владата.
Главната цел на овие економски форуми, според зборовите на Мицкоски, е македонската економија и домашните компании директно да се вмрежат и да воспостават соработка со моќните бизнис кругови во Истанбул. Премиерот потенцираше дека кај турските бизнисмени веќе постои исклучително голем и реален интерес за нови инвестиции во Македонија.
Во текот на дводневниот престој во Истанбул, владината делегација детално ќе ги презентира развојните капацитети на македонското стопанство, како и сите конкретни поволности, олеснувања и системска поддршка кои извршната власт ги нуди за привлекување на странски директни инвестиции. По завршувањето на првиот дел од економскиот настан, премиерот изрази оптимизам, нагласувајќи дека очекува многу успешни деловни состаноци и испраќање на силни пораки за идна економска соработка меѓу двете држави.
