Министерката за финансии Нина Ангеловска не сака да ја коментира одлуката на Уставниот суд за оспорување на уредбата на Владата со која сите именувани лица требаше да земат минимална плата од 14.500 денари, но вели дека сите треба да бидат солидарни во ситуација кога земјава се справува со коронавирусот.
На прес-конференцијата во Владата, Ангеловска рече дека како министер останува на ставоти оти сите треба солидарно да понесат дел од одговорноста.
– Сметам дека и администрацијата треба да понесе дел од товарот кој го носи приватниот сектор и вработените во приватните компании, а кои се оние кои го полнат Буџетот. Не би ја коментирала одлуката на Уставниот суд, но очекуваме дека сите ќе бидат солидарни и никој нема да остане недопрен во оваа криза. Тоа е многу важно да го прикажеме преку своите дела, истакна Ангеловска.
