Пред неколку дена убава вест се рашири на социјалните мрежи, хуман гест кој пренесе силна порака. Насер Харуни, поранешен боксерски шампион на Македонија, боксерски тренер и сопственик на клуб во Старата скопска чаршија, најде чанта со голема сума на пари и документи, и ја врати кај среќниот сопственик.
Овој хуман гест, кој допре до многу луѓе, испрати силна порака дека и покрај различностите пред сè најважно е да бидеме луѓе. Со денови на нашиот портал ова беше најчитана вест, и по тој повод тимот на Фронтлајн направи кратко интервју со Насер.
ФРОНТЛАЈН: Насер, гестот што го направи пред неколку дена одекна во јавноста како пример за чесност, хуманост, но и меѓусебна почит меѓу различните заедници кај нас. Кажи ни накратко за случката, дали воопшто постоеше мисла да постапиш поинаку?
НАСЕР: Никогаш не би помислил нешто друго, кога знам дека туѓо е, и нормално дека на некој друг тоа му припаѓа. Такво размислување никогаш не сум ни имал, и нема да имам.
ФРОНТЛАЈН: Оние што добро те познаваат, излегоа со многу информации и коментари дека на некој начин, имаш скриен талент да обединуваш, независно од верските и националните определби. Која е твојата тајна, како успеваш во тоа?
НАСЕР: Сите тие што ме знаат, знаат дека сум во Капан Ан, и кога чаршијата беше, може да кажам, умрена, јас со моите најблиски преземавме иницијатива, го скршивме ледот, но на почетокот сите имаа предрасуди за чаршијата, лоши муабети.. Но почнаа после да се организираат журки кај нас, во Капан Ан, и Македонците се вратија во чаршијата, видоа дека не е онака како што размислуваа порано, и сега супер се дружиме и убаво ни’ е. Инаку сум и поранешен шампион на Македонија во тешка категорија, сум тренер на Боксерски клуб „Шкупи“, и сум тренер на Младинската репрезентација на Македонија.
Секогаш и на децата им велам да се дружат, а не да се тепаат во автобуси, бидејќи нивниот талент треба да го докажат во ринг, а не на улица.
ФРОНТЛАЈН: Дали си се соочил некогаш со националистички напади?
НАСЕР: Сме имале такви случаи, но знаете како викаат старите, од едното уво влегува, од другото излегува. Не се замарам со такви работи, сме имале такви ситуации, но нема потреба да се зборува за тоа.
Искра Ежова
Камера: Атанас Петровски
Монтажа: Ариан Мехмети
