Светската здравствена организација (СЗО) соопшти дека тимот што го истражува потеклото на пандемијата на коронавирусот ја заврши својата мисија во Кина и порача дека се подготвува да распореди поголема група експерти во областа во која се сомнева дека се појави пандемијата.
Генералниот директор на СЗО, Тедрос Адана Гебрејесус вчера во Женева рече дека меѓународен тим ќе биде испратен во кинескиот град Вухан, од каде се верува дека почна пандемијата кон крајот на минатата година.
Тој додаде дека „проектните задачи“ биле осмислени од СЗО и Кина, но не прецизира какви задачи се во прашање.
Извршниот директор на СЗО за вонредни состојби Мајкл Рајан укажа дека има „празнини во епидемиолошкиот пејзаж“ и најави дека ќе се изврши проценка на соодветни студии и собрани податоци.
– Откако еднаш ќе разберете каде е скршена бариерата, тогаш преминувате на истражување на животинската страна на посистематски начин, рече Рајан.