Австралија соопшти дека ќе ја продолжи забраната за патување за уште најмалку три месеци за да ја заштити земјата од ширењето на коронавирусот.
Ограничувањата за посетителите од целиот свет беа воведени во март, а на Австралијците и на оние со постојан престој, исто така, им е забрането да ја напуштаат земјата освен ако не им се одобри изземање, пренесува Хина.
По совет на австралискиот здравствен орган АХППЦ, министерот за здравство Грег Хант соопшти дека забраната ќе биде продолжена барем до 17 декември.
– АХППЦ наведува дека ситуацијата со Ковид-19 продолжува да претставува неприфатлив ризик за јавното здравје … Продолжувањето на вонредниот период е соодветен одговор на тој ризик, рече тој.
Пратениците од опозицијата се спротивставија на одлуката, велејќи дека владата го игнорира прашањето за 23.000 Австралијци кои престојуваат во странство.
Портпаролката на лабуристите, Кристина Кенели денеска го обвини премиерот дека ги „оставил луѓето“.
Досега во Австралија од Ковид-19 починаа 737 луѓе, а заразени 26.049 од почетокот на пандемијата.
