Бројот на заразени со коронавирус од почетокот на пандемијата во Италија денеска надмина еден милион, откако во изминатите 24 часа во земјата се регистрирани 32.961 нов случај, соопшти италијанското Министерство за здравство.
Според Министерството, денеска се потврдени и најголем број на починати од 6 април – 623, што претставува значаен пораст во однос на претходниот ден, кога беа регистрирани 580 смртни случаи. Досега од последиците на коронавирусот починале вкупно 42.953 луѓе.
Пандемијата на Ковид-19 најтешко го погоди регионот Ломбардија, каде се потврдени 8.180 новозаразени лица.
Бројот на починати лица од последиците на коронавирусот во Велика Британија денеска надмина 50.000, откако се регистрирани 595 нови смртни случаи, покажуваат владините податоци.
Ова е најголем дневен пораст на бројот на смртни случаи од 12 мај, кога се регистрирани 614 смртни случаи. Така, вкупниот број на починати од почетокот на пандемијата достигна 50.365.
Според последните податоци, потврдени се 22.950 нови случаи на заразени со коронавирус, што претставува пораст во споредба со вчера, кога тој број изнесуваше 20.412.
Директорот на медицинската служба на Агенцијата за јавно здравје на Англија, Ивон Дојл, изјави дека трендот на зголемување на бројот на смртни случаи најверојатно ќе продолжи и посочи дека ќе поминат неколку недели пред да се видат последиците од сегашните рестриктивни мерки.
Велика Британија бележи најголем број смртни случаи од последиците на вирусот во Европа.







