Македонската економија е најслободна во регионот, на 17-то место во Европа и 33-то во светот, според фондацијата „Херитиџ“

Деновиве СДСМ објави дека извозот во првите седум месеци од годинава е за 14,5 отсто поголем во однос на истиот период од 2018 година. Според СДСМ, тоа е последниот показател за успешноста на економските реформи.

„Економските политики на Владата предводена од СДСМ даваат реални, видливи резултати од кои придобивки имаат сите граѓани. Економијата е стабилна и се движи во добар правец“ – се вели во соопштението на СДСМ.

Според Индексот на економски слободи за 2019 на фондацијата „Херитиџ“, Македонија е рангирана на 33 место во светот според индексот на економски слободи за 2019 година, што е меѓународно признание за успесите во економијата и нашата држава ја става на прво место во регионот, како најслободна економија.

При рангирањето, Индексот зема предвид четири фактори: владеење на правото, јавно трошење, регулаторна ефикасност и отвореност на пазарот. Македонија е оценета како макроекономски стабилна, но стои и препораката треба да се работи повеќе на фискалната политика, непродуктивните трошења и сивата економија.

„Како одговорна партија сериозно ги сфаќаме и критиките на „Херитиџ“.  Затоа, со политиките што веќе се имплементираат ќе се зајакне системот на спроведување на законите и подобрување на состојбите во адресираните прашања. Продолжуваме посветено да работиме на спроведување на политиките што обезбедуваат економски раст и развој, зголемена конкурентност и стопанство ослободено од политички притисоци. Градиме развојна економија што отвора шанса за сите“ – објавува Центарот за комуникации со јавноста на СДСМ.

Во Индексот се изнесени забелешки во категоријата Владеење на правото, каде што правото на сопственост е оценето со коефициентот 65,1, ефикасноста на судовите со 60,7, а владиниот интегритет со 44,7.

Наспроти забелешките на сметка на владеењето на правото, во Индексот на „Херитиџ“, за економските слободи, Македонија бележи високи оценки во категоријата Регулаторна ефикасност и отвореноста на пазарот. Така, во категоријата Отвореност на пазарот, трговските слободи се оценети со коефициент 82 (од можни 100), инвестициските слободи со 65, а финансиските слободи со 60.

Во категоријата за оценка на регулаторната ефикасност, се бележат уште повисоки вредности, па така слободите за водење бизнис се оценети со коефициент 80,2, трудовите слободи со 71,5 и монетарните слободи со 78,7.

Џ. Дерала