Скопје денеска по единаесетти пат „маршираше“ на розовата прошетка „Напред розово 2019 – чекори против ракот на дојка“, во организација на Здружението „БОРКА – за секој нов ден“ и Амбасадата на САД во земјава.
Настанот започна во 11 часот пред Школка во Градскиот парк, а повеќе од 1.500 пешачеа неколку километри. Кога пристигнаа на градскиот плоштад, учесниците формираа розова машна.
Денешната порака е важноста на раната дијагноза и поддршката на пациентите, како основен предуслов за победа над ракот на дојка.
На прошетката учествуваа многу граѓани, вклучувајќи и организирано учество на поддржувачи на Борка од градовите низ Македонија.
Учесниците уживаа во музички хепенинг чија цел е да се овозможи луѓето, т.е. борците против ракот на дојка да се зближат, да се дружат и да го слават животот.
Како и претходните години, така и оваа, собраните средства преку продажба на розови маици ќе се искористат за реализација на годишните активности на Здружението Борка, а тоа се: обезбедување на психосоцијална помош и поддршка за болните од рак и нивните семејства, обезбедување на перики за жените со низок социјален статус кои примаат хемотерапија, посета на клиниката за онкологија и торакална хирургија од страна на волонтери на Здружението, одржување на бесплатната СОС линија за помош и поддршка и др.
Акција која Борка ја организира со години, fronline.mk силно ја поддржува и ѝ се придружува. Тимот на Frontline.mk секогаш се залага за родова еднаквост, борба против секое зло, војни, болести, против расна, сексуална, полова или било која дискриминација по било која основа и е против секој напад врз различностите. Сите сме луѓе – сите сме еднакви, е нашето начело за кое ќе се бориме. Посебен акцент, нашиот тим ќе стави на онеправдените и омаловажуваните, и ќе се бори за нивните права!!!
Тимот на FRONTLINE.MK
