Владата ќе биде мртва, ако лидерите на ЕУ донесат негативна одлука за почеток на преговори, изјави премиерот Зоран Заев на дебата во Виена, пренесе Радио Слободна Европа.
„И тоа е многу важно. Јас затоа очекувам дека реформите можат да се движат во ЕУ а процесот на проширување да продолжи со Република Северна Македонија и Албанија. Тоа е многу важно бидејќи само така ќе продолжи мотивацијата, Западниот Балкан да се менува, подобрува и сто тоа да стигне поблиску до стандардите кои ги имаат земјите членки на ЕУ“, рече Заев.
Тој вели дека со таква одлука власта ќе го загуби мнозинството во Парламентот од кое барале да гласа за промена на името на државата и за промена на Уставот. Пратениците се убедувале за глас со ветување дека ЕУ ќе испорача датум за преговори. И затоа, како што вели Заев, верува дека ЕУ ќе го испорача тоа за да не им се остави простор на трети страни да завладеат со регион и да не се остави простор за радикален национализам, додава Заев.
„Алтернатива за нас нема. Ако не се донесе одлука ние не можеме да се откажеме од ЕУ. Секако дека ЕУ е нашата иднина. Веројатно ќе ја уништи Владата во Македонија. Но, ќе дојдат некои други и ќе го продолжат тој пат. Затоа што ние поради ЕУ го сменивме дури и нашето име. Направивме договори со Бугарија и Грција. Ги унапредивме односите со Србија, Албанија, Косово, со соседите во тој правец . Јас верувам дека ќе има се повеќе и повеќе мотивација за да продолжиме да работиме посилно за да покажеме уште повеќе успех“, рече Заев.
Во регионот има интереси и на трети страни, вели тој, споменувајќи ги Русија, Турција, Кина, кои според него не нудат владеење на правото и демократија.
Извор: Радио Слободна Европа