Фесјбук профилот „Јован Кукузел“ со очигледна „бојкотирачка ориентација“, пред малку објави пост во кој целосно е преземена содржината на текстот на FRONTLINE.MK „Дацо Белски, поранешниот телохранител на Сашо Мијалков, избегал од домашен притвор“, објавен на 16 ноември 2019. Разликата во објавата на „Кукузел“ е во тоа што, на крајот од објавата се споделува и информација за која не постои официјална потврда. „Кукузел“ објавува: „Откако избега истиот се наоѓа во подрачје на Република Бугарија. Пред 7 дена е претепан во Софија/ моментално е во критична состојба.“
„Кукузел“ ја споделува и оваа фотографија во состав на еден колаж од фотографии, без некоја особена смисла:
Не е потврдено дали оваа фотографија е автентична, но во секој случај, целата објава е крајно сомнителна.
Текстот што „Кукузел“ без прашање го презема од FRONTLINE.MK гласи:
Драганчо Стоименов, алијас Дацо Белски, осудуван или под истрага за повеќе кривични дела, избега од домашен притвор, според информации од нашите соработници во Кочани. За Белски последен пат се слушна во јавноста откако доби притвор како осомничен за обид за убиство, по пукањето во ресторанот „Аква“ во Кочани минатата пролет. Тој самиот се предаде на властите во април.
Белски е поранешен телохранител на Сашо Мијалков, братучед на бегалецот од правда Никола Груевски и поранешен директор на УБК. Тој ѝ е познат на јавноста и од случајот Детонатор, кога во 2012 година, со полициска акција во источниот дел на земјата беа разрешени 13 полициски началници и командири, беа запленети околу 1.000 покер апарати, 14 лица беа осудени на затворски казни. Во тој случај, Дацо Белски беше на „оштетената страна“.
„На лицето за кое прашувате судот му одредил мерка куќен притвор. Според надлежноста, полицијата прави проверки неколку пати во текот на денот. При последната проверка, извршена вчера, констатирано е дека лицето не е дома, односно не ја почитува мерката на судот и за тоа веднаш е известен судот. По наредба на судот веднаш се преземени мерки и активности за пронаоѓање на лицето“ – изјавија официјални извори од МВР за FRONTLINE.MK.
Останува да се види која е целта на оваа објава и преземањето на текстот од FRONTLINE.MK во овој контекст.
Едит: Потврдено е дека фотографијата не е автентична, дека се работи за фејк фотка која е земена од ова видео со крајно вознемирувачка содржина постирано на Твитер од руски профил IgoR.