пишува: РИБАРО
Откако на денешните прес-конференции на министерот за здравство Венко Филипче еден од присутните новинари во салата го праша министерот што станува со оние кои сакаат периодов да реновираат, на социјалните мрежи се разви широка дебата околу поставеното прашање.
Екипата на АХА стои на ставот дека новинарот сосема легитимно си го постави прашањето и не гледа што има толку чудно човек да си праша да реновира сега кога има светска пандемија на Ковид-19 или не. Што е толку чудно кога се апелира во цел свет да се седи дома и да се избегнуваат контакти, кога се затвораат граници, аеродроми, кога ништо не функционира нормално, навистина не гледаме зошто би било чудно и нелегитимно да се постави ова прашање. Што е чудно кога министерот има по три прес-конференции на ден, кога координира десетици болници, стотици тела во здравство, кога раководи со кризен штаб, кога не знае глава каде му е, па да не му се скрши алот да одговори на едно така фино питајнце? За што го плаќаме бе?
Легитимни прашања до министерот Филипче во оваа кризна ситуација се и:
Министре, а смееме ли гаргараме со оцет и гоџи бери?
Дали да го исчистам болјерот од бигор, или не?
Да користиме исклучиво Виледа сунгерчињата или може и алтернативни сега кога е време на криза?
Дали да менувам памперс на едно месечно бебе, или да оставам детето дури да прозбори и да ми каже самото дали да му ги сменам?
Вакви и слични прашања непрестано пристигнуваат во редакцијата на АХА, а ние ревносно ги собираме и имаме намера сосема легитимно да му ги поставиме на Филипче на наредната прес-конференција.
Воедно покренуваме апел до сите совесни корисници на социјалните мрежи да застанат во одбрана на новинарот кој го постави прашањето.
Мотото на акцијата со која сакаме да го ПОДДРЖИМЕ новинарот РЕНОВИЧАР е
ОСТАВЕТЕ ГО НОВИНАРОТ РЕНОВИРАЧОТ НА МИР!
Рубриката АХА! е простор за хумор и сатира. Секоја сличност со реалноста е намерна и не е претерана.
FRONTLINE.MK
