Министерот за здравство Венко Филипче ги објави новите бројки од новозаболени регистрирани пациенти од корона вирус.
Потврдени се 9 нови случаи на коронавирус во земјата. Со ова бројката на дијагностицирани пациенти со КОВИД-19 денеска до 12.00 часот, изнесува 85.
Според местото на постојано живеење, случаи на КОВИД-19 се регистрирани во 6 градови: Скопје, Дебар, Штип, Кавадарци, Гостивар и Охрид.
Состојбата на хоспитализираните пациенти Клиниката за инфективни болести и фебрилни состојби е непроменета во однос на вчера. Единствената пациентка која е на респираторна машина е во критична фаза, тројца се со форма на потешка пневмонија, но во моментов се стабилни, а останатите пациенти се со полесна клиничка слика. Сите пациенти кои се на домашно лекување се во постојан контакт со лекарите од клиниката и нивната клиничка е стабилна и лесна. Пациентите кои се во Дебар се во стабилна и лесна состојба
Филипче истакна дека од денеска ќе е во функција Кол центарот во Здравствениот дом во Скопје (во текот на денот ќе биде соопштен и телефонскиот број), а од понеделник ќе функционираат и двата пунктови – во Поликлиниките во Чаир и Јане Сандански, во кои ќе можат да се земаат брисеви.
Од понеделник пациентите ќе може да се јават и кај матичните лекари за да се закаже земање материјал за испитување во двата пункта. Новите распираторни апарати кои треба да се набават ќе бидат со цена од16 000 евра, а во моментов министерот Филипче истакна дека имаме 120 респираторни апарати во клиниките.
Ј. Ѓ.
