Над 50 штитови за лице Општина Прилеп распредели денеска во прилепската градска болница „Борка Талески“. Заштитните 3Д-штитови, превенствено се наменети за персоналот од Инфективното одделение како и за лекарите специјалисти и останатиот медицински персонал кој е во непосреден контакт со пациентите.
Според директорот на прилепската болница, Драган Богоески, заштитните штитови ќе се користат во ситуација кога здравствените работници се во контакт со лица заболени од корона вирусот, или со други пациенти за кои постои сомневање дека се заразени со корона вирус.
Заштитни штитови добија и вработените во Итната медицинска помош, кои во новонастаната ситуација со пандемијата, имаат потреба од дополнителна заштита.
Во текот на утрешниот и следните денови, здравствените установи од Прилеп ќе добијат онолку заштитни штитови колку што им се потребни.
Од „Ипринт“, прилепската компанија која ја започна идејата и ја спроведе во делот со повеќе компании во Прилеп, велат дека ќе ја интензивираат изработката на заштитни штитови и дека во соработка со фирмите „Резонатор“ и „Графика Дизајн“, на дневна основа ќе произведуваат значително поголеми количини на штитови кои, идентично како и заштитните маски, општина Прилеп ќе ги распределува според приоритети.
Заштитните 3Д-маски се ставаат над заштитната платнена маска за да обезбедат поголема заштита од зараза.
Прилепската компанија „Ипринт“ ја почна реализацијата на оваа идеја, која треба да премине во пошироко производство, поттикната од пример на ентузијасти во Италија кои саа да им помогнат на медицинскиет лица, најдректно соочени со заразата при појавата на корона вирусот. Со поддршка на локалнитe власти од Прилеп отворена е и Фејсбук страница „3Д принт“ на која се пријавуваат фирми кои може да го забрзаат производството на овој вид заштитни средства.
