За долг собран од 2015, 2016 и 2017 година, на Општина Гостивар од денес им е блокирана сметката. Градоначалникот Арбен Таравари обвини дека овој потег доаѓа во време кога со владина одлука извршителите немаат право да водат извршна постапка, а ситуацијата да стане уште поалармантна, тој потсетува дека ова се случува кога целиот свет води битка против пандемијата „Ковид 19“.
“Наредбата да се остави Гостивар без пари во овој период дојдена е со директивите на еден политички субјект во Гостивар кој, во годините кога раководеа со локалната власт, Гостивар го потонаа во долгови. За време на своето владеење, таа партија им исплатувала на пожарникарите 20 отсто помала плата од предвидената со закон”, изјави Таравари.
Градоначалникот на Гостивар, Арбен Таравари, на прес-конференција објасни дека и покрај договорот постигнат со пожарникарите, долгот да биде прифатен и платен на рати, партијата им дала наредба на своите милитанти вработени во ППТЕ Гостивар, постапката оди на извршување.
“И покрај ова, им велам на граѓаните да бидат комотни, затоа што ќе ја надминеме оваа состојба и покрај тоа што се случува во многу тежок период, на една институција да му се блокира сметката и тоа е скандалозно”, изјави градоначалникот на Гостивар, Арбен Таравари, кој додаде дека долгот кон пожарникарите е создаен во текот на 2015, 2016 и 2017 година.
Сумата што треба да им се исплати на пожарникарите е околу 100.000 евра и ќе биде тешко да се соберат овие пари за неколку дена, во услови кога граѓаните не плаќаат даноци заради состојбата која преовладува во земјава.
За ова, градоначалникот Таравари го информирал и техничкиот премиер Оливер Спасовски, кој што рекол дека нема сознанија за случајот.
