Министерот за здравство, Венко Филипче на редовната прес конференција која сѐ уште е во тек, информираше за последните промени со корона вирусот кај нас.
Филипче ја отвори прес конференцијата со информацијата дека 5 пациенти се испишани од Инфективната клиника во Скопје и се пратени на домашно лекување.
На 11 од 28-те заразени во Дебар им се прават контролни тестови и се очекува да се негативни според поминатото време во карантин.
Потврден е уште еден смртен случај, 65 годишна пациентка со дополнителна респираторна состојба. Починатата од Лабуништа била постмортем тестирана позитивна на вирусот.
На Инфективната клиника вчера биле примени 9 пациенти, и сега се вкупно 59, од кои 5 се на респиратори.
Во последни 24 часа регистрирани се 25 нови случаи, со што кај нас до денес има 354 евидентирани позитивни на корона вирус. До сега кај нас направени се 3775 тестирања.
Една 80 годишна пациентка од Штип е примена во Скопје, со прв негативен тест, втор позитивен, и заради контакт со неа, превентивно 4 медицински лица се во изолација.
Резервна медицинска сестра на Пулмологија е позитивна на вирусот. Сестрата се придржувала до сите заштити.
За информациите од Гинеколошко-акушерката клиника во Скопје, 27 годишната второротка од Куманово, породена е со царски рез, на 31 март нејзиниот брис бил позитивен на корона вирус. Машкото бебе е недоносено и е во инкубатор. Нема компликации кај него, не е на респираторна помош, туку само на стандардната за предвреме родени бебиња. Денес и бебето ќе биде тестирано. Пациентката кога била примена немала температура, но кажала дека имала симптоми претходно, како и член на нејзиното семејство кој бил вратен од Хрватска, земја со среден ризик. Пациентката е пренесена на Инфективната клиника, а бебето е на ГАК.
Другата, 37 годишна родилка од Охрид која почина, била примена со висока температура и констатиран мртов плод. Земен ѝ бил брис за тестирање за корона вирус. Плодот бил отстранет и можно е тоа да било една од причините за нејзината високата температура. Пациентката била со неколку отежителни карактеристики, меѓу кои и зголема телесна тежина. Случајот ќе се анализира и за постапката на Брзата помош и за сите други околности. ГАК е целосно безбедна од корона вирусот, има целосно изолиран оперативен дел и дел за интензивна нега,
Исто така, во врска со трудниците и родилките, министерот апелира сите оние кои доаѓаат на ГАК да кажуваат искрено и точно за сѐ што се прашани за да може соодветно да се постапува. Ретки се случаите на пренесување на вирусот од трудница на плод, додаде министерот.
Породилното отсуство е дискутирано на централен штаб, ќе има и законска измена со цел да се продолжат постоечките породилни боледувања бидејќи мајките не можат да ги запишат децата во градинка сега во вонредна состојба.
Воспоставена е координација меѓу институциите и тоа е од многу голема помош. Имаме капацитет, здравствениот систем е спремен и за поголем број пациенти, и за пикот на епидемијата кој е најавен за крајот на месец април.
Министерот нагласува дека заштитна опрема и резерви има во огромен број, се врши и соодветен транспорт на истите, информацијата дека нема заштитна опрема по амбулантите не е точна. Секоја здравствена институција има и тимови за координација по ова прашање.
