Лидерот на СДСМ, Зоран Заев кој во вчерашното интервју за Канал 5 ги објасни стратегиите за борба против корона вирусот, денес на својот Фејсбук профил го објасни процесот на дејствување на двата елементи од стратегијата и нивната ефикасна имплементација.
Стратегијата на „чекан и танц“ е долгорочен план кој првично вклучува мерки за спречување на ширењето, а подоцна и мерки за контролирање на болеста во смисла на изнаоѓање лек или вакцина, и како таков, „танцот“ би траел подолго.
„ЧЕКАН И ТАНЦ
Стратегијата на „чекан“ и „танц“ во справување со корона вирусот e базирана на долгорочен план за сузбивање на вирусот преку комбинирани мерки и интензитет на нивно спроведување.
Оваа стратегија предвидува комбинација на силни, остри мерки за сузбивање и намалување на вирусот (чекан) на почеток, а потоа и мерки за држење под контрола на заразата (танцот).
„Чеканот“ претставува почетна и агресивна реакција кон сузбивање на заразата и добивање на повеќе време за да може да се пронајде вакцина. Во овие драстични мерки спаѓаат и мерките кои нашата држава навремено и ефикасно ги спроведува (затворање училишта, факултети, забрана за јавни собири, забрана за движење, изолација, самоизолација, тестирања).
Откако ќе се примени „чеканот“ и епидемијата е ставена под контрола, следува фазата на „танц“ односно периодот до пронаоѓање на вакцината кој може да биде и подолг.
Оваа стратегија дава добар резултат и може да го намали времето за справување со последиците, здравствени и економски.
Ова е заедничка борба за сите нас, од нас зависи колку силно ќе удри „чеканот“ и колку долго ќе трае „танцот“. Да бидеме одговорни и сериозни, да ги почитуваме во целост мерките и задолженијата затоа што тие се за наше добро.
Само така ќе излеземе како победници од оваа глобална здравствена и економска закана.“ – напиша Заев на својот ФБ статус.
