Премиерот Спасовски кој пред неколку дена го доби негативниот тест за Ковид-19 на кој беше подложен заедно со министерот за здравство, Венко Филипче, откако ден по посетата на Куманово беше објавено дека градоначалникот на општината, Максим Димитриевски е позитивен на корона вирус,даде интервју за порталот Фактор.
Олабавувањето на полицискиот час во ниту еден случај не е поради верскиот празник Рамазан. Спасовски открива дека се прави план за опоравување на економијата по сектори и дека почнува враќањето на животот во нормала, но тоа ќе оди постепено.
Премиерот нагласи дека целта на мерките не е да се пишуваат казни, туку да се заштитат граѓаните.
Наша намера не е да казнуваме. Го олабавивме движењето со продолжување на слободното време за движење, односно со скратување на рестрикциите. Но рековме, тоа не значи дека го релаксираме целиот амбиент за движење, бидејки за такво нешто, според стручните лица, е сѐ уште рано, додава Спасовски.
Ваквата поставеност, којашто треба да се гледа во пакет, намалени рестрикции за движење во комбинација со задолжителни превентивни мерки, односно мерките за заштита, не значи олабавување во секојдневното функционирање, туку поставување поинаков рестриктивен принцип на функционирање, на којшто кора да се навикнеме и да го прифатиме.
Слушаме од здравствените власти и во земјава и во светот, никој не може да предвиди до кога ќе биде потребно да се функционира на ваков начин, со заштита и на дистанца, но сите се согласни дека тоа е неопходно и во догледна иднина ќе биде неопходно.
Целта на новодонесените мерки е да се зголеми јавната свест за личната одговорност во однесувањето и движењето, како подготовка за периодот кога ќе пристапиме кон етапно, да го наречеме „отворање“ на општественото функционирање. Затоа, ве молам, сфатете го овој пакет на намалени рестрикции, а зајакнати превентивни мерки, подеднакво одговорно како и претходните мерки што подразбираа поголемо времетраење на полицискиот час.
Од почитувањето на новодонесените мерки ќе зависи и какви резултати ќе имаме на здравствен план, а од тоа и кога оптимално би можело да се очекува да стартува реактивирањето на бизнисите и економските капацитети во очекуваниот обем. Тоа е потребно за егзистенцијата на граѓаните, за сочувувањето на работните места, за работата на малите бизниси и големите компании, за економијата во целост.
Инаку, сакам да потенцирам дека сите донесени мерки и одлуки на Владата се врз основа на проценките, препораките, сугестиите на епидемиолозите, здравствените работници, експертите и така е правилно и одговорно да се работи.
Комисијата за заразни болести работи темелно, ги зема предвид препораките на СЗО, позитивните искуства на државите коишто бележат резултати во справувањето со корона кризата, а коишто се блиски до нашите карактеристики како држава и како менталитет, тоа и правиме и ние како Влада и тоа е вистинскиот пат како треба да се работи. Така и работиме, вели премиерот Спасовски во интервјуто.
Во врска со текот на учебната година и можното одложување на државната матура, премиерот изјави дека Владата за тоа подетално ќе одлучува по првомајските празници.
