Во одговор на демантот, а во интерес на Петар Ристески, како и во интерес на јавноста, Редакцијата потенцира дека текстот на кој се однесува демантот е заснован на коментари на социјалните мрежи. Во текстот јасно и видливо е наведено дека се работи за содржина, односно објава на социјалната мрежа Твитер. Се работи за следниот твит:
Редакцијата ги отфрла обвинувањата од Ристески дека се работи за злоупотреба и местенка. Едно треба да биде јасно: Објавен е коментар од социјалните мрежи, Редакцијата нема намера да прави никакви злоупотреби, ниту местенки.
Коментарите на социјалните мрежи се со понов датум, односно во времето на вонредните мерки за заштита од ширењето на коронавирусот. Тие коментари се придружени со фотографии објавени на социјалните мрежи од јавни профили.
Веројатно, демантот треба да се упати до социјалната мрежа Твитер, како и до авторот на објавата на која свое место нашла оваа „стара“ фотографија, како што тврди Ристески.
Демантот од Ристески е уредно објавен во истата рубрика, истиот ден кога е објавена и содржината на која се однесува демантот. Линк до демантот е поместен и во овој одговор од Редакцијата до Ристески и до јавноста.
Редакцијата смета дека е потребно да се истакне и следното:
Јавните личности и политичарите треба да бидат свесни за својата општествена позиција и да го прифатат фактот дека се предмет на интерес на јавноста, на пофалби, но и на критики.
Секој треба да биде заштитен од лажните вести и од говорот на омразата.
Јавните личности, а особено политичарите, имаат обврска да дадат свој придонес во борбата против лажните вести и говорот на омразата со личен пример и апел до своите поддржувачи и до пошироката јавност, да се престане со манипулативното и насилничкото однесување на интернет.
Одговорноста, транспарентноста и отвореноста се водечки начела на Редакцијата Фронтлајн. Од првиот ден, Фронтлајн целосно се става во служба на јавниот интерес.
