Пандемијата на коронавирус, за време на која се заразени повеќе од 16 милиони луѓе, е веројатно најлошата глобална здравствена криза со која се соочила Светската здравствена организација, изјави денеска директорот на СЗО, Тедрос Аданом Гебрејесус.
Тој на редовниот онлајн брифинг во Жeнева истакна дека светот може да го победи вирусот само со строго придржување кон здравствените мерки, од носење маски до избегнување метеж.
– Онаму каде се почитуваат овие мерки, бројот на случаи се намалува, а таму каде што тие не се почитуваат, бројот на случаи се зголемува, рече Тедрос.
Тој ги издвои Канада, Кина, Германија и Јужна Кореја како земји кои добро ја контролираат ситуацијата.
Директорот на програмата за вонредни состојби на СЗО, Мајк Рајан оцени дека земјите ширум светот треба, по дефинирањето на вториот бран, нови пикови и локални жаришта, да имаат поголема потреба да продолжат да одржуваат строги епидемиолошки ограничувања, како што е физичкото растојание.
– Јасно е дека притисокот врз вирусот ги намалува бројките и дека олеснувањето на притисокот ги зголемува, појасни Рајан, признавајќи дека, сепак, е невозможно границите меѓу државите да останат затворени до неодредено време./MИА/
