Министерот за правда Бојан Маричиќ денеска се сретна со в.д. претседателот на Врховниот суд на Република Северна Македонија, Фаик Арслани.
На средбата се дискутираше околу спроведувањето на реформите и состојбите во правосудството, како и воедначување и подобрување на судската пракса.
Министерот за правда Бојан Маричиќ истакна дека очекува активно учество на Врховниот суд на Република Северна Македонија како највисока судска инстанца во државата и нејзино вклучување во реформите во правосудството.
Маричиќ денеска се сретна и со претседателот на Советот на јавни обвинители Ацо Колевски.
На средбата акцент беше ставен околу спроведувањето на Законот за Советот на јавни обвинители и одговорностите кои го очекуваат советот во поглед на отворањето на Поглавјето 23, имајќи предвид дека обвинителската пракса ќе биде во фокусот на преговорите.
Министерот Маричиќ истакна дека очекува од Советот на јавни обвинители да ги изготви и донесе подзаконските акти кои произлегуваат од Законот за Јавното обвинителство со кои се зајакнува одговорноста на јавните обвинители.
На средбата министерот Маричиќ потенцираше дека ќе биде поддршка за кадровско зајакнување на јавното обвинителство со кое ќе се овозможи поефикасна борба против криминалот и корупцијата.
