Министерот за здравство, Венко Филипче, утрово на својот фејсбук профил напиша дека остварил средба со медицинските сестри кои вчера дадоа отказ, и ја информираше јавноста дека заедно ќе најдат решение ќе ги надминат проблемите.
„Утрово се сретнав со колешките Зорица, Силвана и Дивна, медицински сестри од Инфективната Клиника. Тие изминативе седум месеци се на првата линија во борбата со пандемијата. За нивната посветеност и неуморна работа им изразив огромна благодарност. Кога се работи во такви тешки услови со многу стрес и замор, разбирливо е да дојде до потреба за промена за што целосно ги разбирам. Сепак, утрово ги поканив на разговор и разговаравме да останат на Клиниката каде нивната работа неизмерно се вреднува. Се договоривме после заслужениот одмор кој го земаа повторно да разговараме и да најдеме начин да продолжиме заедно во битката со Ковид на Инфективната Клиника.“
„Секој човек во здравството е важен и ќе направам се за да ги мотивирам здравствените работници“, потенцираше министерот Филипче.
