Министерот за здравство Венко Филипче денеска најави дека на Владата на утрешната седница ќе и предложи сите економски оператори да работат до 23 часот, јавен превоз да биде исполнет 50 отсто, во администрацијата, општините и судовите, секаде каде што тоа е можно, работниот процес да се одвива во смени или онлајн од дома или редуцирано по систем на ротации.
– Ова е последниот чекор пред воведување на полициски час, изјави Филипче презентирајќи ја двонеделната анализа за состојбата со Ковид-19.
Овие мерки ќе бидат дополнение на измените на Законот за заштита на населението од заразни болести, што веќе е доставен во Собранието. Со него се предвидуваше носење маска на отворено, ограничување на групирањето по 22 часот и ограничување на бројот на лица на семејни собири.
-Во законската измена којашто утре е веќе во собраниска процедура се дава можност овие мерки, коишто претходно беа регулирани со Уредбата со законска сила, односно внесуваме уште еден став со којшто ќе се прифаќаат сите други мерки со одлуката на Владата. Значи, оваа е единствена законска измена која што ќе даде можност за сите овие други мерки да се прифаќаат од Владата без дополнителна измена во законот, изјави на денешната прес-конференција Филипче.
Овие мерки би стапиле во сила до крајот на неделата.
– Треба мнозинство од 61 пратеник. Јас не очекувам да трае целиот тој процес повеќе од неколку дена. Верувам дека до крајот на неделата овие мерки ќе бидат во сила, рече министерот за здравство.
Вирусот е многу проширен насекаде, рече Филипче, истакнувајќи дека значително се зголемува бројот на заболени, а болниците се исполнуваат.
Тој им порача на граѓаните дека ситуацијата е навистина сериозна, дека следен чекор би бил целосно ограничување на движењето односно полициски час.
– Да смогнеме сили сите, затоа што ова е начинот, истакна Филипче, посочувајќи дека бројот на заболени се зголемува и во регионот и насекаде во Европа.