пишува: БРАНИСЛАВ ЃОРЃЕВСКИ
Од денот кога за првпат беше прогласена вонредна состојба заради поефикасно справување со коронавирусот, во време без собраниски состав и со Влада по „пржински модел“ ВМРО-ДПМНЕ на чело со Христијан Мицкоски со неодговорно однесување застана на страна на коронавирусот и спротивно на здравјето на граѓаните.
Додека државата се соочуваше со првите удари од коронавирусот, додека сите се соочуваа со првите непознаници околу тоа што би се случувало, Мицкоски наместо конструктивност, поита да шири паника во јавноста. Јавно, на телевизиско гостување, изјави дека во државата немало доволно тестови, односно уште одвај сто теста за коронавирусот, со што внесе вознемиреност во јавноста.
Но, времето ќе покаже дека конструктивноста што граѓаните ја очекуваа од Мицкоски тој ја разбира на поинаков начин. Оспорувајќи ги капацитетите на здравствените власти, Мицкоски „без срам и перде“ понуди доктори од редовите на ВМРО-ДПМНЕ кои би помогнале во справување со кризата, небаре докторите членови на ВМРО-ДПМНЕ работат во паралелен здравствен систем, а не во македонското јавно здравство.
И додека поради заштита од ширење на вирусот се затворија угостителско-туристички објекти, фитнес центри, шопинг-молови, во јавноста се појавија снимки како Мицкоски влегува во теретана која во тој период не смее да работи. И како тоа да не беше доволно Мицкоски беше „жив фатен“ како седи во затворен дел од ресторан кој исто така не смееше да работи, при тоа правејќи се дека не ги разбрал протоколите кои секојдневно ги критикуваше, патем ангажирајќи ги сите структури на Наќе Чулев да се обидат да му го исперат срамот.
Истиот тој Чулев, најверојатно по налог на Мицкоски јавно излезе и кажа дека полицијата нема да ги казнува граѓаните кои не ги почитуваат мерките и забраните, охрабрувајќи ја јавноста масовно да ги прекршува протоколите за заштита.
За деструкцијата на ВМРО-ДПМНЕ да биде што поголема, се погрижи уште еден кадар на Мицкоски во тогашната преодна Влада. Гордана Кочовска Димитриеска од позиција на заменик дополнителна министерка за финансии, свесно го блокираше заемот од Светска банка од 90 милиони евра. Најмалку 33 милиони од нив, беа наменети за унапредување на центрите за интензивна нега со цел подобра подготвеност на јавното здравство за есенскиот бран на коронавирусот.
Дури и поразот на парламентарните избори и казната од граѓаните не ги освестија Мицкоски и ВМРО-ДПМНЕ дека се на спротивната страна на интересите на граѓаните и нивното здравје. Напротив, неполн месец по изборите, тие започнаа да органзираат масовни собири и таканаречени протести на кои масовно се кршеа мерките за задолжително носење маска и држење дистанца.
Последниот во низата примери за несериозното и опасно однесување на ВМРО-ДПМНЕ се нивните барања за создавање нова паралелна или контра Комисија за заразни болести составена и со претставници од нивната партија.
Наместо ефикасни, брзи измени на Законот за заштита на населението од заразни болести, ВМРО-ДПМНЕ со денови го блокираше овој Закон условувајќи го расформирање на Комисијата за заразни болести (постојано тело во Министерството за здравство) и создавање на нова паралелна Комисија во која најверојатно би бил вклучен и членот на ИК на ВМРО-ДПМНЕ Вело Марковски човекот кој велеше дека вирусот не е опасен, дека пандемијата ќе заврши за еден месец и слични ставови преку кои внесува конфузија меѓу граѓаните.
Една изрека вели колку си внимателен за другите, толку си повеќе внимателен за себеси. Како тргнале Мицкоски и ВМРО-ДПМНЕ ниту се грижат за своето, а уште помалку за здравјето на другите, ним се им е низ призма на политички поени, низ призма на промили личен и партиски рејтинг. Но и во тој есап се далеку од математички прецизни, целосно несвесни дека деструкцијата што ја предизвикуваат е општа, но штетата од неа е само нивна.
