Институтот за семејни студии на својот фејсбук профил отвори една анкета во која постави скандалозно прашање и го израмни предметот сексуалното образование со предметот планирање на семејство и ги замоли своите следбеници да гласаат на истата. Институт за семејни студии – Institute of Family Studies е најнов член на Филозофскиот факултет. Анкетата набрзо беше повлечена, иако не доволно брзо пред да наиде на остри критики на социјалните мрежи.
Под анкетата имаше недолични коментари кои одсликуваа говор на омраза, хомофобија и целосно неразбирање на поимот сексуално образование – па поради тоа беше избришана од нивниот профил.
„ Институтот е формиран во 2014-тата година како дванаесетиот институт на истиот факултет. Филозофскиот факултет е пионир во специјализираното проучување на семејството. Студиската програма по семејни студии е права програма од ваков тип на Балканот. Група професори, визионери ја формираале оваа студиска програма по примерите на долгогодишната традиција на факултетите во Европа, Америка, Канада и Австралија. Во академската 2014/15 се запишале првите студенти по семејни студии”. – вака е објаснета историјата и функцијата на институтот на нивната официјална страна.
Kако главна цел на овој институт е залагање за проучување на семејството од сите негови аспекти.
Ова отвара една интересна тема за анализирање.
Дали ние воопшто знаеме што значи предметот сексуално образование и колку ние навистина сме запознаени со тоа?
Свесни сме дека секојдневно сме жртви и сме сведоци на сексуално вознемирување, токму поради ова – поради сексуалната неписменост која ја имаме како народ – што за мене е невиден пропуст.
Во коментарите под анкетата, можеа да се прочитаат погрдни зборови за одредени групи на луѓе, целосна стигматизација, навредување на истите, говор на омраза кој потикнува насилство – само поради еден единствен факт, а тоа е не разбирање на „Сексуално образование”.
Значи да прочитаме за да разбереме: „Сеопфатното сексуално образование (ССО) подразбира учење за когнитивниот, емоционалниот, социјалниот, и физичкиот аспект на сексуалноста. Сексуалното образование започнува рано во детството и продолжува низ адолесценцијата и зрелоста. За децата и младите луѓе има за цел поддршка и заштита на сексуалниот развој. ССО се состои од 7 компоненти: род, сексуално и репродуктивно здравје, граѓански аспекти, задоволство, врски и односи, насилство и различност.”
Секако „планирање на семејство” е важен дел од сексуалното образование и секако ќе биде час и тема на разговарање.
Важно е да се потенцира дека сексуалното образование ќе создаде млади без предрасуди со отворени погледи кон модерното демократско општество и ќе го исправи искривеното огледало на вредности кое е закоравено во нашето општество од самото создавање на истото.
Ненасилство, прифаќање на себе и своето тело, почит кон другите и емпатични кон различностите, ова се дел од причините за воведување на сеопфатно сексуално образование во формалното образование.
И да се надеваме дека за 10 години од сега нема да сме сведоци на такви хомофобични и одвратни коментари кои ја уништуваат надежта дека полека стануваме нормално општество.
Владанка Димковска
