коментира: ЏАБИР ДЕРАЛА
Петтата на листата на кандидат(к)и (Изборна единица 3) за пратеници во македонскиот парламент за ултрадесничарската Левица, Жаклина Свеќаровска, според една објава на Фејсбук, на која има и скриншот, коментира:
„А што ако момчето било толку пијано, па не сконтало дали му рекла да или не? Од каде претпоставката дека тој мора да сочува студена глава дури и кога таа не знае каде ѝ е главата?“
Дали е можно? Добро ли читаме? Оваа кандидатка за фотелја во македонскиот законодавен дом, според наведеното, го оправдува сексуалното насилство, силувањето – директно и отворено! Навистина, дали е можно? Дали погрешиме ако заклучиме дека овој партиски „крем“ го одразува ставот на партијата? Дали партијата ќе излезе со официјален став по ова прашање во парламентот? Се разбира, откако ќе се задоволат сите финансиски апетити на нивниот шеф за кого некои автори го креираа и хаштагот #ЛеваРукаДесниЏеб?
На голем број прашања, исто како и нивните поголеми и побогати браќа и сестри во опозицијата, така и портпаролите и функционерите на оваа партија не одговориле на ниедно прашање до сега. Тоа не им пречи на функционерите на оваа (со лажен назив) и на неколку други партии, вклучувајќи ја и нивната голема, зла и богата сестра, секој ден да се занимаваат со нас, служејќи се со екстремен говор на омразата.
Дали ќе одговорат сега? Или мислат дека не мора да одговорат, бидејќи одговорот се подразбира? Секако, за очекување е дека и за ова, како и за сè друго, ќе одмолчат. Поточно, ќе „одговорат“ на веќе познатиот начин, со здодевни тиради по нивните портали и со постови на социјалните мрежи, сето тоа полно со говор на омраза, лаги и клевети.
И ќе продолжат да ги заобиколуваат прашањата на само ним својствен начин – плитко, со валкан јазик. Нивните неславни постапки и ставови, омразата и повиците на екстремно насилство, изречени во јавноста се, всушност, нивното политичко оружје.
Секој ден се будат и заспиваат со мислата како да навредат и како да напакостат. И се разбира, дебело да наплатат од парите на граѓанките и граѓаните.
Катастрофа се луѓево.
