Од МВР ги потврдија информациите за скандалозното однесување на пратеникот Абдула Салиу од Алијансата за Албанците на граничниот премин Блаце, вечерта на 27 февруари.
Веројатно, погрешно толкувајќи ја функцијата пратеник, од позиција на моќ, пратеникот Салиу, при влез во земјава, едноставно, не сакал да чека во редицата возила, како и сите „обични смртници“. Тој се качил на тротоарот со својот Фолкваген Пасат, ги поминал возилата што чекале во редицата, ја одминал кабината на пограничната служба и се довезол до просторот каде што се врши царина, објави Фронтлајн претходно.
Кога пограничниот службеник му пришол на возилото, пратеникот Салиу продолжил со своето скандалозно однесување. Излегол од возилото и му се развикал на службеникот, велејќи му дека е пратеник во Собранието на РСМ и дека за него не важат стандардните процедури при премин на границата.
Дошол и раководителот на пограничниот премин и се обидел да ја смири ситуацијата и да ја објасни процедурата за премин на граница. Но „семоќниот“ пратеник продолжил со викање – никаде низ Европа не чекал на граница и нема намера да чека ни тука. Според изјавите од теренот, гласно рекол дека никој ништо не му може.
Службениците го предупредиле пратеникот Салиу дека ќе биде поднесен службен поднесок во врска со неговото однесување. Според потврдата од МВР, против пратеникот Салиу ќе бидат поднесени пријави по член 4 од Законот за прекршоците против јавниот ред и мир, по Законот гранична контрола (избегнување гранична контрола) и по Законот за безбедност на сообраќајот на патиштата (престигнување колона).
Тоа не е сè. Претходно, Салиу го испратил своето малолетно дете до кабината да ги даде документите и да ја пренесе пораката од татко му дека не можел да чека во ред. Службеникот ги одбил документите, бидејќи решил да го почитува и одржува редот меѓу патниците.
Како што пренесува Цивил Медиа од порталите на албански јазик, пратеникот Салиу го потврдил инцидентот, но со „скратена“ верзија: „Полицаецот не прифаќаше да ги земе документите, ми ги исфрли на земја и ми рече сам да влезам кај шефовите. По одредено време, ги зеде и ги испрати за контрола. Излегоа Ќамуран Харединовски и Агим Барди. Повикаа уште ефен шеф и му кажаа дека сум пратеник на опозицијата. Ми рекоа дека наводно сум прекршил правилник и ми се заканија дека ке ми пишат опомена и дека ќе испратат известување во канцелариите на МНР. Потоа ми рекоа: Нема врска што си пратеник, ако сакаме ќе ти завршиме работа, ако не сакаме, ќе те држиме тука“.
За Цивил Медиа, пак, пратеникот изјавил дека нема што да додаде. „Тие (МВР) прават како што сакаат самите“ – бил неговиот краток коментар.
Салиу не кажа ни збор за тоа дека излегол од колона, возел по тротоар, сакал да помине преку ред и барал да добие специјален третман.
Д. Е.
