Македонија отсекогаш била непресушен извор на убавина. Охрид е убав и во пролет, во есен, во зима, особено во лето… Впрочем Охрид е секогаш убав. Младата охриѓанка Нина Ангелоска, на која хоби и е фотографијата, секојдневно ја чести нејзината публика со прекрасни фотографии од Охрид и околината. Фотографии од стариот дел на градот, до селата и урбаното градско подрачје, се само дел од нејзиното големо портфолио. ФРОНТЛАЈН денес имаше прилика да разговара со Нина, и во прилог да ви достави една нејзина прекрасна галерија посветена на убавините на Охрид.
Нина Ангелоска е ученичка во Охридската гимназија, личност која ја сака природата, фотографијата, географијата, спортот… Конкретно на ова поле има постигнато повеќе успеси. Еден од оние на кој кажува дека е особено горда е тоа што учествувала во монографијата за 60 години постоење на Охридско лето со нејзини 4 фотографии.
ФРОНТЛАЈН: Од кога се појави желбата за фотографирање?
Со самото созревање на некој начин дојде и самата желба која ја имам. На почетокот фотографирав со мобилен телефон но потоа со самото запознавање со Светски признатата фотографка Билјана Јуруковски го добив и фото апаратот со кој моментално работам.
ФРОНТЛАЈН: Што најмногу сакаш да фотографираш?
Засега сеуште не сум определена кон одреден правец на фотографија но целта ми е да го промовирам мојот роден град. Може да се каже дека сакам да ја фотографирам природата во која го наоѓам мирот, и воедно тоа е местото на кое човек може да ја добие најголемата инспирација.
ФРОНТЛАЈН: Дали постои фотограф, чии фотографии ти даваат инспирација и им се восхитуваш?
Секој фотограф преку својата фотографија на некој начин се преставува самиот тој или пак неговото расположение. Уметноста е поле на кое секое дело е добро. Конкретно јас се инспирирам од самата себе. Имам многу пријатели кои се занимаваат со фотографија и сите нивни дела се прекрасни.
ФРОНТЛАЈН: Освен пејсажите кои во голем број се наоѓаат на твојот профил, за каков друг вид на фотографија си заинтересирана?
Главниот мотив ми е да се промовира мојот град и да уживам во тоа што го правам.
ФРОНТЛАЈН: Бидејќи си релативно млада, дали фотографирањето може да игра клучна улога во избирањето на твојата идна професија?
Засега, иако фотографијата ме инспирира и ме влече, сепак, мислам дека конкретно со оваа професија во Македонија не може да се опстане многу. Секако дека ќе продолжам да работам, но првенствено ќе имам друга професија.
ФРОНТЛАЈН: Каде заинтересираните купувачи можат да ја најдат твојата галерија?
Оние кои се заинтересирани за да купат фотографија можат да ги разгледаат фотографиите на мојот профил Nina’s Photography на Фејсбук и да ме контактираат во приватна порака. Цената на фотографијата зависи од самата големина, а исто така и од материјалот од кој е направена на пример: платно, фотографска хартија. Слободно заинтересаните може да ме контактираат во било кое време.
Нејзиниот труд може да го проследите на нејзиниот Фејсбук профил Nina’s photography. Фотографиите зборуваат и повеќе од доволно самите за себе!
Марија Миткоска
