Сопругата на претседателот, Елизабета Ѓоргиевска по повод месецот посветен на подигнување на свеста за присуството и прифаќањето на лицата со аутизам, денеска го посети Заводот за рехабилитација на слух, говор и глас – Скопје.
Денешната посета, како што соопшти Кабинетот на претседателот, е со цел запознавање со работата и предизвиците со кои се соочува оваа установа и е во знак на поддршка на лицата со аутистичен спектар на нарушувања.
За време на посетата, директорката на ЈЗУ Завод за рехабилитација на слух, говор и глас – Скопје, др. сци. Силвана Филипова ја запозна сопругата на претседателот со работата на заводот, при што беа посетени логопедскиот кабинет, кабинетот за аудуометрија, кабинетот за рана говорно-јазичка интервенција и сурдолошкиот кабинет. Ѓоргиевска, исто така, го посети и одделот за рехабилитација на деца со потешки развојни нарушувања, деца со аутистичен спектар на нарушувања и деца со сензорни дисфункции, информираат од Кабинетот на претседателот.
Подигнувањето на свеста на јавноста за аутизмот е многу значајна за раната дијагностика и раната интервенција кај лицата со аутистичен спектар на нарушувања. Со нашата поддршка може да придонесеме во подобрувањето на квалитетот на живот и поголемата инклузивност на овие лица, претежно деца, истакна Ѓоргиевска.
ЈЗУ Завод за рехабилитација на слух, говор и глас – Скопје е специјализирана и акредитирана здравствена установа во која се врши детекција, дијагностика, рана интервенција и третман на сите видови на патологија во вербалната комуникација кај деца и возрасни. Во моментов во оваа установа рехабилитациски третман посетуваат вкупно 56 деца со аутистичен спектар на нарушувања и деца со сензорни дисфункции, стои во соопштението.
