Плочата поставена на 28 април кај тетовското село Вејце во спомен на осуммината загинати припадници на безбедносните сили, што загинаа во воениот конфликт во 2001 година, денеска претседателот на Одборот на бранители, Марин Најдов, ја затече искршена и фрлена во долот во месноста на Шар Планина викана Брезовица.
Тој смета дека ваквите вандалски чинови само го одмагаат процесот на создавање едно општество за сите, за кое како што рече и тие како Одбор на Бранители се залагаат.
„Ова не е првпат да се сквернават спомен обележјата. Бараме да се најдат сторителите и да одговорат кој е мотивот за ваквите чинови. Јас апелирав до властите да преземат превентивни чекори и да не се дозволат вакви работи. Јас го повикав вицепремиерот Артан Груби овој пат смогне сили, не за да помогне да имаме соживот, затоа што соживот имаме, туку да смогне сили да бидеме едно општество за сите, односно да не дозволи и да преземе чекори да не се кршат спомен обележјата. Се надевав дека овој пат тоа нема да се случи и тоа беше мотив да отидам и да видам дали е таа плоча на тоа место, но видовме дека плочата е скршена. И овој пат апелирам да се најде сторителот, не е во прашање казна и не се работи за материјална штета, туку се повредени чувствата на бранителите и на децата од бранителите и сите ние чувствуваме. Тука нема политика во ставање на плоча, туку едноставно одбележуваме 20 години од загинувањето и оддаваме почит и сочувствуваме.
Како Одбор на бранители ние буквално не се занимаваме со спомен обележјата на припадниците на ОНА кои ги има и се работи за грандиозни обележја. Тие си ги одбележуваат датумите со сочувства до загинатите, така сакаме и нас никој да не нѐ провоцира.
Спомен обележјата на ОНА никој не ги погледнал, а камоли да ги оштети. Не сакаме да се конфронтираме со никого сакаме едно општество, ама не сакаме и нас никој да не конфронтира. Тој што ги крши нашите плочи што му е мотивот, ако ние не водиме политика, ако сакаме да водиме едно општество за сите и сега ако некој ги крши нашите плочи, нормално дека на тоа гледаме како на провокација и вака не можеме да изградиме едно општество за сите. И затоа и сега по втор пат го повикувам вицепремиерот Артан Груби да смогне сили да се најде сторителот и да се запраша што е тоа што него го тера да крши плочи“, истакна претседателот на Одборот на бранители, Марин Најдов.
Од Секторот за внатрешни работи Тетово велат дека по пријавата од Одборот на бранители за сквернавењето на спомен плочата во атарот Брезовица, пратени се веднаш полициски екипи на лице место кое е фото-документирано, а плочата која била фрлена во бездна вратена на место.
„Како за овој случај така и за претходните, односно за спомен плочите на припадници на македонските безбедносни сили за кои се пријавени оштетувања полицијата презема мерки“, информираше портпаролот на СВР Тетово Марјан Јосифоски
Без разлика на сѐ, од Одборот на бранители додаваат дека нема да се откажат и дека натаму ќе ги одбележуваат достојно годишнините од загинувањето на бранителите.
Зоран Димовски