Поранешниот директор на УБК, Сашо Мијалков и шестмина припадници на поранешната единица „Алфа“, обвинети во предметот „Тортура“, кој се однесува на начинот на кој беше уапсен лидерот на Обединети за Македонија, Љубе Бошкоски, денеска се ослободени од обвинение.
Судечкиот совет предводен од судијката Александра Ристеска ги ослободи од обвинение Сашо Мијалков, Ивица Анчевски, Петар Милошевски, Новица Станковски, Филип Атанасов, Јован Боцевски и Метуш Шабани со образложение дека Јавното обвинителството не докажало надвор од разумно сомневање дека обвинетите го сториле делото за кое се обвинуваат.
Како што истакна судијката Ристеска, каменот на сопнување на судот да донесе мериторна одлука бил недостиг на индивидуализацијата на дејствијата на извршување и експликација на битниот придонес на секој од поединечно обвинетите лица. Дополни дека токму овие спорни прашања, кои што биле недоволно разјаснети за судот, се провлекувале во текот на целата доказна постапка и тоа, според неа, е прва и последна причина зошто судот бил ажурен со дополнителни прашања.
– Самото обвинение во делот на поттикнувањето сторено од обвинетиот Сашо Мијалков за судот остана на ниво на претпоставка која што била основа за правење на теоријата на случај на јавниот обвинител во конкретниов предмет, без јасно утврден каузален тек на настаните, бидејќи судот, во конкретниов случај, нема законски овластувања да излегува надвор од диспозитивот на обвинението и да утврдува факти кои би значеле отуѓување од идентитетот на обвинението и пресудата на конкретниов случај, истакна Ристеска
Јавниот обвинител, во дополнението на доказната постапка, остана доследен на претходното поднесено обвинение и истото, според Ристеска, не го допрецизира на начин од кој што ќе може да се утврди кои дејствија на извршување на кривично дело или, каков битен придонес за извршување на кривичното дело имале поединечно сите обвинети.
Јавниот обвинител, Љубомир Лапе, по пресудата изјави дека обвинението е доволно прецизно и детално се опишани сите дејствија како соизвршителски дејствија и ваквата пресуда упатува порака дека ваквиот начин на апсење е дозволен со законот.
– Во модерните демократски цивилизирани општества, ваквиот начин на лишување од слобода е забранет и санкциониран. Судот пропушти да ги санкционира сторителите при состојба на јасни и недвосмислени докази, рече обвинителот при што дополни дека по добивање на пресудата ќе вложат жалба по сите основи и ќе остане на истото обвинение.
Случајот за апсењето на Љубе Бошкоски беше вратен во фаза на дополнение на доказна постапка, откако судијката Ристеска, која го води судењето за предметот „Тортура”, на 17 јуни оваа година, не ја објави најавената пресуда за овој случај.
Во доказната постапка Обвинителството тврдеше дека при апсењето на Бошкоски имало мачење и дека тоа било „реваншизам“. Тој не давал отпор, а била употребена полициска сила, бил легнат на земја во близина на полски тоалет кај ресторанот „Воденица“ во Скопје, бил враќан за да го снимаат телевизиските камери со цел јавно да го омаловажат, а сето тоа предизвикало психичко страдање.
