Северна Македонија го чествува Денот кога како дел од антифашистичката коалиција дојде до своја и слободна држава, денес дел од најпрогресивните демократии. Инвестиравме во проекти што живот значат, над 100 км патишта, над 60 градинки, 80 училишта, 34 болници, проекти со повеќе од 500 милиони евра, 50 милиони евра за долговите на општините, а реализиравме над 7000 проекти, истакна Заев. Бугарија сеуште не попушта околу Фронтекс. Се намалува бројот на починати како компликација на корона вирусот.
ПОЛИТИКА И ИЗБОРИ
Од Европската Комисија за потврдија дека договорот за управување со границите помеѓу ЕУ и Северна Македонија останува блокиран од страна на Бугарија затоа што оваа земја не го признава македонскиот јазик. Договорот со агенција на ЕУ, позната и како Фронтекс, е заглавен три години, Бугарија одбива да го потпише поради јазичната клаузула.
Иако не сум дел од кандидатите на овие локални избори, ја следам кампањата и непријатно ме изненади еден коментар на кандидат за градоначаник на град Скопје, г-ѓа Петровска, каде префрлува одговорност на погрешна адреса. Имено, Ана Петровска е една од авторките на Студијата за оцена на влијанието врз животната средина на проектот за Национален гасификационен систем во Република Македонија Делница 5 Скопје-Гостивар-Кичево (Гасоводот на Водно) од 2011 година, обвини директорот на „Пошта“ и поранешен министер Јани Макрадули.
Ако пред 80 години, патриотизам беше да се земе пушка и да се води борба против окупаторот, денес патриотизам е да се креираат мерки и да се води борба против невработеноста и за повисок економски стандард, рече премиерот и претседател на СДСМ, Зоран Заев од митингот на партијата во Прилеп.
Делегација на Владата на Република Северна Македонија предводена од министерот за внатрешни работи Оливер Спасовски, придружуван од заменик-министерот за политички систем и односи меѓу заедниците Илхан Рахман, положи венец свежо цвеќе пред Спомен костурницата во Куманово посветена на борците кои животот го дадоа во народно-ослободителната војна.
Заев предводен од владината делегација заедно со Битиќи, со министерката за труд и социјална политика Јагода Шахпаска и министерот за транспорт и врски Благој Бочварски, положи венци цвеќе на споменичниот комплекс „Могила на непобедените“, како дел од програмските содржини за чествување на празникот 11 Октомври – Ден на народното востание и 80 години од овој настан.
Иако денес тешко е да се даде одговор на големите историски дилеми кои биле актуелни пред многу години, можеме да бидеме сигурни дека ако не бевме дел од антифашистичката коалиција, денес немаше да имаме своја држава, рече претседателот Стево Пендаровски во своето обраќање во рамки на свечена празнична програма за одбележување на Денот на народното востание, 11 Октомври во Прилеп.
Ќе го гасифицираме градот за да ја зачуваме природата, истакна Заев од Крушево. Се планира нов систем на вода за да немаат граѓаните проблем со водоснабдувањето, нови патишта, привлекување на туристи во секој дел од годината и поддршка од Владата за сите проекти.
Согласно новите најавени мерки од страна на градоначалникот Петре Шилегов, просечно скопско семејство со две деца или повеќе деца во градинка и основно училиште, на годишна основа ќе може да заштеди меѓу 350 и 400 евра на храна.
СОЦИЈАЛНИ МРЕЖИ
Партизаните не носеле црни кошули, тие се бореле против „црнокошуљашите“ – паравоени формации на фашистите на Мусолини кои се изживувале врз сите неистомисленици, најмногу врз социјалистите, пишува Жарко Трајаноски на Фејсбук.
ПАНДЕМИЈА
Денес се регистрирани 111 нови лабораториски позитивни случаи на SARS CoV-2, со што вкупната бројка на дијагностицирани лица со КОВИД-19 изнесува 195.002. Оздравени се 165 пациенти, во изминативе 24 часа – пријавени се 15 починати лица.
Вакцинацијата против Ковид-19 го намалува ризикот од хоспитализација и смрт за 90 проценти кај луѓе постари од 50 години, и се чини дека е ефикасна против Делта варијантата коронавирус, покажуваат резултатите од нова француска студија.
СВЕТ
Поверојатно е дека политичките објави на социјалните медиуми ќе станат вирални доколку во нив се критикуваат противниците, во споредба со оние што се поддржува колега со ист политички став, покажа британска студија. Негативното го надминува позитивното на социјалните медиуми.
М. М.
