Од партијата ВМРО-ДПМНЕ молчат за заканите на член од обезбедувањето на Мицкоски упатени кон граѓани за време на вчерашниот митинг во Вевчани.
Откако редакцијата на Фронтлајн стапи во контакт со лицето кон кого биле упатени заканите и тој го опиша инцидентот, веднаш побаравме објаснување од ВМРО-ДПМНЕ на мејл адресата што е на нивната веб страница, под која стои дека одговараат веднаш, но до овој момент (12 часа од упатеното барање) не добивме никаков одговор.
Како што објавивме вчера, обезбедувањето на шефот на ВМРО-ДПМНЕ, Христијан Мицкоски, му се заканувало на Танче Шекуткоски, го легитимирало и ја фотографирало неговата лична исправа, за време на митингот во Вевчани под мотото „Создади нова иднина“, што партијата го одржа вчера, 24 октомври.
Шекуткоски за Фронтлајн изјави дека бил присутен на собирот во Вевчани каде што Мицкоски држел говор. Додека траел говорот граѓанинот извикал:
„Уа!“.
Веднаш, еден припадник на обезбедувањето на Мицкоски му пришол и го прашал зошто го направил тоа, на што нашиот соговорник му одговорил дека не се согласува со кажаното и има право да го искаже своето негодување.
Тогаш, телохранителот на Мицкоски му побарал да се легитимира. Шекуткоски ја дал личната карта без негодување, но бил изненаден кога видел дека телохранителот на Мицкоски ја фотографирал неговата лична исправа пред да му ја врати.
Телохранителот на Мицкоски му се заканил на граѓанинот со зборовите:
„Ќе видиш кога ќе дојдеме на власт!“
Граѓанинот тогаш го прашал како се вика телохранителот кој му се заканувал и му ја фотографирал личната исправа, на што тој се претставил како Димитар Димовски.
Кога Фронтлајн разговараше со Шекуткоски, тој го пријавуваше случајот во полициска станица.
И сопственикот на локалот „Госип“, Младен Даскалоски од Вевчани, кој бил очевидец, реагираше на својот Фејсбук профил за настанатиот инцидент.
„Некаде оклу 20:30 часот на терасата во објектот „Госип“, во кој сум сопственик и вработен, во моментот на дешавката келнер, при партиски собир, лице претставено како полицаец со име и презиме
Димитар Димовски, без никакво образложение и без притоа да покаже службена легитимација, почна да бара лични документи и да се заканува на наши гости од непознати причини. На тоа, ЈАС лично реагирав со прашање, „кој е господинот и со кое право истиот легитимира наши гости?“ но, на истото прашање не добив никаков одговор, освен арогантно понашање!
Познавајќи ме мене, како и нашиот објект сите знаете дека без разлика на партиска, верска и било каква припадност, безпрекорно сте дочекани и послужени сите кои сте сакале да не посетите!
На крај, од мое лично име порачувам следно:
НЕ СЕ ПЛАШИМЕ ОД НИКОЈ И НИКОГАШ!
Наша силна страна е правдата, чесноста и слободата!!!
Секој е добредојден, освен тие што на „нивните” им викаат „ШТО БАРАТЕ ТАМУ“ тие не се наши…
Некој ако сака да создади нова иднина на ваков начин, гадно се залажал.“, напиша во објата Даскалоски.
Очигледно целокупната атмосфера во државата е сменета и луѓето без страв слободно известуваат за немили настани и закани што ги добиваат од политичките чинители.
Д. Е.
