ВМРО-ДПМНЕ победи на локалните избори ветувајќи ефикасно менаџирање со општините, излегување во пресрет на потребите на граѓаните, големи проекти со кои ќе им се подобри животот на населението, а нивните градоначалници веднаш штом седнаа на фотељите побараа помош и пари од централната власт. Од истата онаа за која нивното раководство секојдневно истура товар обвинувања за некадарност.
Уште зимата не ги покажала своите заби, а ЗЕЛС предводен од градоначалничката на Скопје Данела Арсовска нема никаква програма за решавње на проблемот со затоплувањето на скопјани и на другите општини.
Иако во предизборието најавуваше дека за се постои решение само требало добро да се изменаџираат работите, кога се сочи со потешкотии на терен, спас побара од Владата.
„Владата да преземе одговорност и да им помогне на Општините“, рече Данела Арсовска, оценувајќи ја состојбата како алармантна и предупреди за можна редукција на услугите.
Мандатарот Ковачевски за проблемот со парното греење ја обвини неажурноста на градските власти, но сепак најави мерки за решавање на настанатата состојба.
„Владата нема да дозволи жителите на Скопје да останат без парно греење зимава. Целата инфраструктура и услугата за затоплување со парно греење е во надлежност на градот Скопје и тој требал да предвиди мерки кои што очигледно не се предвидени“, вели Ковачевски.
Иако Градот Скопје и општините во склоп на градот, се надлежни за создавање на услови за континуирано снабдување со топлинска енергија, Владата, поради нивно не преземање на мерки за справување со настаната состојба, повторно излезе во пресрет на граѓаните со цел обезбедување на континуитет и сигурност во снабдувањето со топлинска енергија.
Имено, Граѓаните во Скопје и општините во градот нема да плаќаат повисоки сметки за парно, бидејќи Владата нуди да плати 80 отсто и предлага општините да ги доплатат останатите 20 отсто од зголемениот дел од сметката.
Тоа практично значи дека Владата во име на потрошувачите кои се корисници на топлинска енергија, односно домаќинствата и јавните институции, средствата ќе ги уплати на БЕГ, а БЕГ ќе ги намали сметките на потрошувачите.
Министерството за финансии обезбеди поволен кредит од 8 милиони евра со кои БЕГ може да набави гас за парно греење за скопјани, вели мандатарот Димитар Ковачевски и додава дека за кредитот БЕГ треба да понуди гаранција според пазарни банкарски услуги. Ако тоа не се случи, Ковачевски кажа дека се разгледува опција за времено преземање на работењето со компаниите кои имаат лиценци за обезбедување топлинска енергија.
Министерот за економија пак Крешник Бектеши најави дека БЕГ може да остане и без лиценца ако не испорача топлинска енергија за скопјани.
Љубиша Николовски