Австралиските научници велат дека откриле непознат предмет што се врти на Млечниот пат, за кој тврдат дека не е како што било видено досега, пишува Би-Би-Си.
Објектот, првпат откриен од студент на универзитет, е забележано дека ослободува огромен излив на радио енергија за цела минута на секои 18 минути. Објектите со пулсна енергија во универзумот често се документирани. Но, истражувачите велат дека нешто што се вклучува за една минута е многу невообичаено.
Тимот работи да разбере повеќе. Објектот првпат бил откриен од студент на Универзитетот Кертин, Тајрон О’Доерти во регионот на западна Австралија познат како Мурчисон, користејќи телескоп и нова техника што тој ја развил. Студентот бил дел од тимот предводен од астрофизичарката д-р Наташа Харли-Вокер, од јазолот на Универзитетот Кертин на Меѓународниот центар за истражување на радио астрономијата (ICRAR).
„Се појавуваше и исчезнуваше во текот на неколку часа за време на нашите набљудувања“, рече таа во соопштението за медиумите од „ICRAR“ кое го документира откритието.
„Тоа беше сосема неочекувано. Беше некако страшно за еден астроном бидејќи нема ништо познато на небото што го прави тоа“.
Објектите што се вклучуваат и исклучуваат во Универзумот не се нови за астрономите, тие ги нарекуваат „минливи“.
Но, објектот што се вклучи цела минута беше „навистина чуден“, рече астрофизичарот од „ICRAR-Curtin“, д-р Џема Андерсон, цитиран во изданието. „ICRAR“ додаде дека по трагање низ повеќегодишни податоци, тимот успеал да утврди дека објектот е оддалечен околу 4.000 светлосни години од Земјата, е неверојатно светол и има исклучително силно магнетно поле.
Теориите околу тоа што би можел да биде објектот вклучуваат неутронска ѕвезда или бело џуџе, термин што се користи за остатоците од колапсирана ѕвезда. Сепак, голем дел од откритието останува мистерија.
„Повеќе откривања ќе им кажат на астрономите дали ова е редок еднократен настан или огромна нова популација што никогаш порано не сме ја забележале“, рече д-р Харли-Вокер. „Со нетрпение очекувам да го разберам овој објект и потоа да го проширам пребарувањето за да најдам повеќе“.
превод: М. М.