Министерот за здравство Беким Сали, амбасадорката на САД Кејт Брнз, претставници од СЗО и претставничката на УНИЦЕФ Патриција ДиЏовани ја посетија првата од 14-те локални заедници каде што ќе помине караванот за вакцинација против КОВИД-19 во следните две недели. Караванот ќе патува низ целата држава за да им ги приближи информациите за вакцините и самите вакцини на граѓаните од избраните локални заедници, информираат од Министерството за здравство.
-Уште еднаш сакам да потенцирам дека одлуката за вакцинирање не треба да се одложува. Како држава обезбедуваме доволно количини вакцини кои се сигурни и безбедни и се достапни на сите граѓани во државата. Сите заинтересирани граѓани може да се вакцинираат на 14-те локации од организираниот караван, а секој работен ден и во најблискиот Здравствен дом. Вакцините се побезбеден начин за развивање имунитет кон Ковид-19, отколку заразување со вирусот и докажано нудат посигурна заштита од природниот имунитет. Исто така, вакцининирањето е многу важно во контекст на олабавување на заштитните превентивни мерки – колку повеќе луѓе се вакцинираат, толку ќе бидеме подобро заштитени како заедница, изјави министерот за здравство Беким Сали.
Со вакцини против КОВИД-19 досега безбедно се вакцинираа милијарди луѓе ширум светот. Сите вакцини поминуваат низ ригорозни проверки и независни проценки со цел да се осигура нивната безбедност и делотворност.
-Јас се вакцинирав против КОВИД-19 затоа што вакцините се безбедни и ефикасни. Научните факти јасно докажуваат. Како што кажа министерот, пандемијата не е завршена и мора да продолжиме да го комунираме ова. Затоа ми е многу драго што сме партнери на овој проект. Овој караван не само што ќе помогне да ги донесеме вакцините во заедниците, поблиску до луѓето на кои им се потребни, на најраниливите и оние кои се во поголем ризик, туку ќе ги направи попристапни и информациите кои им се потребни“, рече амбасадорката на САД Кејт Брнз.
Омикрон варијантата навидум предизвикува полесни симптоми во споредба со варијантата делта, особено кај оние кои се вакцинирани, но не треба да се потценува. Луѓето заразени со омикрон можат да завршат во болница, а има и смртни случаи. Се очекува дека луѓето кои биле заразени исто така може да развијат т.н. „долг ковид“. „Бустер“ дозите можат да обезбедат континуирана заштита од тешка форма на болеста КОВИД-19 и од смрт, како и да помогнат луѓето да развијат максимална заштита од сите варијанти на вирусот познати во моментот.
-Најголемиот број лица кои се хоспитализирани или умираат поради КОВИД-19 се невакцинирани или нецелосно вакцинирани – за овие лица КОВИД-19 останува болест опасна по живот. Со овој караван сакаме да допреме до луѓето, да ги обезбедиме информациите кои им се потребни, да ги слушнат од луѓе на кои им веруваат и да се погрижиме вакцините против КОВИД-19 да бидат лесно достапни. Зошто да го ризикувате својот живот, кога се потребни само неколку минути за да го спасите? Вакцинирајте се кога караванот ќе дојде во вашата заедница, рече д-р Ане Јохансен, специјален претставник на СЗО Европа за Северна Македонија и шефица на Канцеларијата на СЗО во Скопје.
Пандемијата е далеку од завршена. Ова значи продолжување на мерките за јавно здравје и лична заштита за кои знаеме дека функционираат, вклучително и вакцинација против КОВИД-19. Вакцините се направени да спречат тешка болест и смрт и тие се многу ефикасни во тоа.
-Настаните како овој ни помагаат да ги доближиме вакцините и информациите за нив до локалните заедници. Вакцините се од суштествено значење во спасувањето животи. Тие се безбедни и делотворни и значително го намалуваат ризикот од тешка форма на болест и смрт. Вакцинирајте се за да се заштитите себеси, децата и вашите заедници. Примете и „бустер“ доза за да обезбедите континуирана заштита од сите варијанти на вирусот, рече Патриција ДиЏовани, претставник на УНИЦЕФ во Северна Македонија.
Освен настаните организирани како дел од караванот, граѓаните, исто така, може да се вакцинираат во најблискиот Здравствен дом секој работен ден од 08:00 до 14:00 часот. Вакциналниот пункт во поликлиниката „Букурешт“ во Скопје е отворен до 20:00 часот од понеделник до петок.
Министерството за здравство го почна караванот против КОВИД-19 со поддршка од Агенцијата на САД за меѓународен развој (УСАИД), Светската здравствена организација (СЗО) и Фондот за деца на Обединетите нации (УНИЦЕФ). Во продолжение следува листата со точно време и локации што ќе бидат посетени низ државата:
- 21 март, 11:00-15:00 – плоштадот во Шуто Оризари
- 22 март, 12:00-16:00 – плоштадот во Кратово
- 23 март, 12:00-16:00 – плоштадот во Радовиш
- 24 март, 12:00-16:00 – плоштадот во Струмица
- 25 март, 12:00-16:00 – пазарот во Ново Село (Струмица)
- 26 март, 11:00-15:00 – Скопје, ТЦ „Ист гејт“
- 27 март, 11:00-15:00 – плоштадот во Куманово
- 28 март, 12:00-16:00 – општина Липково, паркингот во село Матејче
- 29 март, 12-00:16-00 – поштата во Арачиново
- 30 март, 12:00-16:00 – општина Чучер Сандево, ОЈУ Партизански дом во село Сандево
- 31 март, 12:00-16:00 – Зелениково, основно училиште „Марко Цепенков“
- 1 април, 12:00-16:00 – општина Врапчиште, Центарот за култура во село Неготино
- 2 април, 11:00-15:00 – Кичево, Центарот за култура
- 3 април, 11:00-15:00 – Струга, новото шеталиште
