Американскиот претседател Џо Бајден „остро ги осуди“ денешните руски ракетни напади врз градови низ Украина, соопшти Белата куќа.
Во нападите се убиени и ранети цивили, мета беа цели кои немаат воено значење. Овие напади уште еднаш ја докажуваат целосната бруталност на илегалната војна на Владимир Путин против украинскиот народ, истакна Бајден во неговата прва реакција по руските ракетни напади.
Американскиот претседател изрази сочувство до семејствата и пријателите на „бесмислено убиените“ Украинци.
Тој додаде дека „овие напади само дополнително ја зајакнуваат нашата посветеност да го поддржиме украинскиот народ, колку и да е потребно“.
Заедно со нашите сојузници и партнери ќе продолжиме да и наметнуваме трошоци на Русија поради нејзината агресија. Путин и Русија мора да одговараат за воените злосторства. Ќе продолжиме да ја даваме сета поддршка што им е потребна на украинските сили за одбрана на својата земја и слобода, изјави Бајден.
Уште еднаш ја повикуваме Русија веднаш да ја прекине оваа неиспровоцирана агресија и да ја повлече својата војска од Украина, заклучи претседателот на САД.
