Фејсбук статусот на Мартин Пановски беше добитен за да стане наслов на оваа анализа, но суштината оди подлабоко…
Возачите и другите вработени во ЈСП излегоа на протест со автобуси на јавното претпријатие за да блокираат сообраќајници и да го изразат револтот од тоа што не зеле плата за септември, но зошто тоа го прават со трошење народни пари?
Кој им дозволил да трошат гориво на десетици автобуси во остварувањето на своите права? Во период кога владее криза и кога Владата се обидува да воведе мерки на штедење, а при тоа и самото претпријатие напоменува дека е во слаба финансиска кондиција и секој следен месец е прашање дали ќе имаат пари за гориво, возачите денеска покажаа неодговорност и потрошија голема количина гориво во остварувањето на своите лични права.
Легитимно е прашањето зошто градоначалничката Данела Арсовска не го спречила ваквиот начин на протест, зошто не ги седна вработените во ЈСП и со нив да договори како да се надмине проблемот со празната градска каса и како да им излезе во пресрет и да им обезбеди плата? Затоа се наметнува потребата од одговоност кај Арсовска и кај директорот на ЈСП кои практично со јавни пари застанаа против граѓаните.
Цел ден предизвикуваат хаос во сообраќајот, а граѓаните го совладуваат метежот видно нервозни. Значи денеска во Скопје имаме ситуација како вработените користат автобуси од јавниот превоз купени со пари од граѓаните, користат гориво купено со пари на граѓаните, а протестот го претворија во блокада на истите тие граѓани кои издвоиле да се купат автобусите и горивото. Вака вработените во ЈСП нема да ја постигнат целта и нема да ја придобијат јавноста на нивна страна. Тие и самите знаат дека за лошата финансиска состојба во нивната фирма вината е во Градот Скопје, поточно кај градоначалничката Арсовска, па затоа таму е вистинската адреса на која треба да протестираат и да си ги бараат парите. Не може своите пари да ги бараат со неодговорно трошење на јавните пари.
Само за споредба, многу категории граѓани доаѓале пред Владата да протестираат, многу од нив и со превозни средства, но не на сметка на сите граѓани. Земјоделците често излегуваат со трактори и други земјоделски машини, но на свој трошок. Само така протестите имаат автентична форма и се искрени во намерата да издејствуваат пари од надлежните институции. Но, во случајот со ЈСП протестот има сосема поинаква димензија, ја загрозува градската каса, која и онака е празна.
Д. Е.
