Дали конечно кривичните дела што ги извршил пратеникот на ВМРО ДПМНЕ, Антонио Милошоски, за кои има веќе долгогодишни истраги, ќе му се „удрат од глава“ и ќе го остават без сертификатот за безбедност? Ако внимателно се следи минатонеделната изјава на директорот на Агенцијата за национална безбедност (АНБ), Виктор Димовски, може да се каже дека се навестува дека Агенцијата ќе покрене постапка за да му се одземе безбедносниот документ на пратеникот. За самиот безбедносен сертификат веќе постојат сомневања дека е добиен на незаконски начин. Имено, иако не го споменува со име, сепак, од содржината на изјавата на Димовски, станува јасно дека се работи за Милошоски.
„Се работи за поранешен министер, сегашен актуелен член на Собранието на РСМ и човек кој води една важна комисија. Но, кога малку проверивме, видовме дека има одредени изоставени важни податоци. Податоци за санкционирање во земја членка на ЕУ во поглед на интересни кривични прекршоци. Не споменувам имиња, како истражувачки новинари проверете за што се работи. Понатаму, како и што ќе се одлучува во однос на тој предмет и останатите предмети каде има пропусти, дополнително ќе ве информираме. Ако сте спремни да вперите прст во некој дали има морален кредибилитет и интегритет, да обвинувате дека злоупотребил службена положба затоа што потпишал предмет потпишан од 10 припадници на АНБ, од кои еден не ја завршил работата, а во исто време против вас се води судски процес за измама и злоупотреба на службена положба, треба да имате кредибилитет и образ за тоа“ – изјави Димовски алудирајќи на постојаните јавни прозивки на Милошоски кон него за издадениот пасош на Украинецот Онишченко.
Димовски дополни дека во овој процес АНБ се навраќа на сите безбедносни проверки од претходно за да утврди дали и каде има пропусти со издавањето на безбедносниот сертификат на Милошоски. Кога се споменува држава членка на ЕУ се мисли на Германија и на кривичните дела кои пратеникот ги има извршено таму, а се однесуваат на фалсификување исправи и на кражба. Иако Милошоски се обидуваше тоа да го демантира пред македонската јавност, сепак, беше обелоденет документ од тетовскиот суд со кој се потврди дека пратеникот навистина сторил две кривични дела во Германија. Таквата казнена евиденција судот ја имал испратено до Државната изборна комисија во пресрет на парламентарните избори во 2020 година и со неа недвосмислено се потврдува дека Милошоски, сепак, бил казнет за кривични дела.
Со оглед дека Димовски во последната јавна изјава го нагласува фактот дека е назначен за директор во период кога Управата за безбедност и контраразузнавање (УБК) преминува во АНБ, тогаш се добива впечаток дека Милошоски го искористил тој правен вакуум за да издејствува некој да му додели безбедносен сертификат. Но, како и да е, сега веќе е јасно дека во АНБ се занимаваат со сертификатот на пратеникот од ВМРО-ДПМНЕ и наскоро јавноста ќе знае дали Милошоски заслужува да поседува таков важен безбедносен документ или ќе мора да му биде одземен.
Во контекст на кривичните дела на пратеникот, јавноста знае дека и пред македонските судови се води предметот „Моќник“ во кој Милошоски е обвинет за измама и за злоупотреба на службената положба. Ова кривично дело, ако биде санкционирано со пресуда, ќе значи дека Милошоски ќе го изгуби правото на безбедносен сертификат и ќе биде доведена под сомнение секоја негова идна државна функција.
Извор: ЦИВИЛ Медиа
