Драго ми е што се сретнав со претседавачот со ОБСЕ, министерот за надворешни работи на Република Северна Македонија Бујар Османи. Денешната задача на сите демократски сили е да обезбедат војната на Русија против Украина да заврши со пораз на Русија, објави претседателот на Врховната Рада на Украина, Руслан Стефанчук, по средбата со Бујар Османи.
Пред два дена како што објави Стефанчук, Украина беше сведок на уште еден ракетен напад, кој доведе до голема трагедија во Днепро. Затоа прва и главна задача што ја нагласи е зајакнувањето на одбранбените капацитети на Украина.
„На Украина и треба повеќе оружје за понатамошно успешно ослободување на нашите територии. Потребни ни се дополнителни системи за воздушна одбрана за заштита на цивилите. Не ни требаат различни верзии на ограничувања. Украина бара воведување на такви санкции кои би ја лишиле Русија од средствата за војната. Сите ресурси што ги добива Руската Федерација од меѓународната трговија, ги троши на убиства и неправедна војна“, истакнува Стефанчук.
Стефанчук истакна дека со Османи разговарале и за имплементацијата на „формулата за мир“ на претседателот на Украина Володимир Зеленски. Сметам на поддршката и застапувањето на оние одредби кои ќе помогнат да се врати мирот и да се заштити светот од војна, нагласи Стефанчук.
Северна Македонија како земја претседавач со ОБСЕ ќе се залага да најде начин повторно да ја врати Организацијата во Украина, порача денеска Османи, кој во рамки на денешната посета на Украина го посети Бородјанка во кијивската област, кој е силно погоден од воените дејствија.
Османи истакна дека комуникацијата со Русија ќе зависи од тоа, како ќе се постави во однос принципите и заложбите на Организацијата, за што, како што кажа, тој како претседавач на ОБСЕ нема да дозволи никаков компромис.
Османи денеска се сретна и со шефот на украинската дипломатија Дмитро Кулеба и изрази силна осуда за континуираната руска агресија врз Украина и потенцираше дека нападите врз цивилни цели немаат никакво оправдување.
Ј. Ѓ.
