Француската Влада денеска на состанок на Советот на министри ја усвои пензиската реформа, демонстрирајќи решеност да не попушта пред барањата на синдикатите, кои имаат намера да продолжат со протестите и штрајковите против водечкиот проект на претседателот Емануел Макрон.
Министерот за труд, Оливие Дусоп, по средбата изјави дека нема да има промена на старосната граница за пензионирање и дека ќе остане како во предложената реформа, пензионирање на 64 години.
Синдикатите и дел од опозицијата најмногу ја оспоруваат законската старосна граница која досега беше 62 години.
По првиот ден од штрајковите и протестите низ Франција одржани во четвртокот, кога се собраа меѓу еден и два милиони луѓе, властите се обидуваат да ги минимизираат протестите, но веќе изјавуваат дека се држат до планот.
Француската Влада се надева дека расправата во Парламентот ќе биде брза и оти реформата би можела да стапи на сила веќе наредното лето.
Следниот голем собир на Французите против реформата е закажан за 31 јануари.
Извор: МИА
