Потпорен ѕид, кој е дел од скалите кои водат од улицата Лазар Личеноски до локацијата на Француски гробишта и Амбасадата на САД во Скопје, е оштетен, а за неговата нестабилност стигнале укажувања до Општина Центар од граѓани.
-Ингеренции и надлежности во овој случај нема Општина Центар поради што и не смее да постапи, но со оглед на сериозноста на работите Општина Центар испрати допис до Градот Скопје кој согласно надлежностите го повикавме да направи увид и го реши проблемот, сподели градоначалникот Герасимовски.
Од Град Скопје се огласија по повод одржувањето на Скопско Кале, каде како што соопштија од општина Центар, е оштетен потпорен ѕид.
-Во врска со половичната информација, а во врска со надлежностите за одржување на Скопското Кале, градот Скопје до овој момент нема добиено никаков допис од ниту една институција – следствено, до овој момент немаме добиено допис ниту од општина Центар. Што се однесува до надлежностите, за Скопското Кале единствено одговорност има Националната Установа Конзерваторски центар. Надлежностите на градот завршуваат со коловозот и тротоарите на ул. Лазар Личеноски, велат од Ггад Скопје.
-Бидејќи до овој момент до градот Скопје нема пристигнато никаков допис во врска со потпорниот ѕид на Скопското Кале на страната на ул.Лазар Личеноски, ги упатуваме од општина Центар да се приклучат на дописот на градот Скопје до Министерството за Култура и НУ „Конзерваторски Центар“, појаснуваат од Град Скопје.
