„Горд сум што можам денеска исправено пред вас да се обратам како Премиер на земја која пред три години, токму на денешниот ден – 27 март, оствари една од нејзините стратешки цели – станавме членка на најмоќниот воено-политички сојуз – НАТО алијансата. 27 март е денот кога Северна Македонија ја запечати својата безбедносна иднина. Момент после кој нашата стабилност не може да биде доведена под прашалник од никој. И од таа точка можеме да чекориме само напред, силно и забрзано“ изјави премиерот Димитар Ковачевски на свеченоста по повод годишнината од членството на Северна Македонија во НАТО и Денот на НАТО.
Тој додаде дека оваа годишина не е само сеќавање на моментот кога македонското знаме се развиори пред седиштето на НАТО во Брисел, туку е момент во кој престанавме да бидеме точна на дневен ред на безбедноста и седнавме на масата која го создава дневниот ред за светската безбедност.
„Нашата национална одлука за членство во Алијансата, ги проби бариерите на партиите, религиите и народите, и не’ обедини. Незначајна маргина се оние малкумина кои не се горди на овој наш успех и би сакале други алтернативи. Убеден сум дека такво обединување имаме и околу нашите одлуки за Европската Унија“ рече Ковачевски.
Премиерот додаде дека НАТО заштитува, обединува и заврстува и дека да се биде НАТО е силна гаранција на нашата територија и безбедност.
„Да се биде НАТО, значи да се дели масата за одлучување со најразвиените земји во светот, да се носат одлуките за светската безбедност заедно со најмоќните. Да се чува нашиот и светскиот мир како дел од воено супериорна, политички силна и релевантна и економски доминантна организација. Мир и развој за безмалку една милијарда луѓе, кои живеат во заеднички демократски вредности“ рече Ковачевски.
